منی مردم زندگ مان اَنت

لیلہ ھالد ءِ سرگْوست

رجانک: سرباز وپاؔ

کویت ءَ درانڈیھ

کویت ءُ مزن ھور ءَ ھما مردم کہ آ کویت ءِ جھمنند نہ اَت آ درآمدے اَت، اَبید چہ برتانوی، امریکہ ءُ آئی ءِ کمکاراں۔

کاتب کردنی

ارب راجدوستی ءِ نوزدھمی دْھک ءِ لیکہ اَت، ایشی بنداتی بھرگ لبزانک نبیساں پٹ ءُ پول کرتگ اَت کہ آ چہ یورپی لیکہ ءُ شھزانتی، برتانیہ ءُ پرانسیسی زانشتجاہ ءِ کتابانی نبشتہ کاراں آشنا اِت اَنت۔ اے بارو ءَ نودربر ءُ شور دیوکیں مردم دیم ءَ اتکگ ءُ اے لیکہ اِش ارزِشت داتگ ارب کلب اش برجاہ داشتگ اَنت۔ گوں دْھک ءِ مٹّ بیگ ءِ ھواری ءَ ارب ءِ لشکریاں ھمے کلبانی تہ ءَ بھر زْرتگ۔

اے وھد ءَ راجدوستی ءِ لیکہ انچو توانمند ءُ ساڑاھگی نہ اَت ءُ نہ آئی ءِ آیوکیں گامگیج پدّر اَت۔ راجدوستی اگاں رودرآتک ءَ بوتین یا روکپت ءَ آئی ءِ کد ءُ کیل روکپتی ایشیا ءُ گوریچانی اپریکہ ءَ گندگ بوتگ اَت۔ لھتیں گچینیں دانشوراں پہ درور الاوگانی ءَ ” اسلامی گُسل” ءِ نام داتگ ءُ ارب ازم ءُ اسلام ءِ پجّار ءَ شمشکار بیتگ۔ اے لیکہ روکپت ءِ دز نبشتیں مردماں گیش مھکم کنگ ءِ جھد کرتگ۔ بلے ایشی ءِ آجو پگری ءُ راجمستری لیکہ اسلام ءِ تہ ءَ گندگ ءُ گمان کنگ بیتگ۔

الاوگانی ءُ آئی ءِ رندگیری کنوکانی ھیال اَت کہ اسلام ءِ تہ ءَ دیم ءَ اَتکگیں جیڑہ دودمان ءُ آدگہ مردمانی بارو ءَ اِنت۔ آیانی ھیال ءَ 1798 ءَ نپولین ءِ مسر ءِ سر ءَ ارش کنگ ءَ پد پرانس ءَ روکپتی اربانی زورگری، پد ءَ مسر ءِ سر ءَ برتانیہ ءِ زورگپتی چوناھا اسلام ءُ ایسائی ءِ جنگانی دْرچ اَت۔ آئی ءِ کِر ءَ اے ھم تچکیں پسّو ھست اَت کہ مسلمان جھان ءَ یک مھذبے ءِ وڑ ءَ پیش دارگ لوٹگ ءَ اَنت، بلے روکپت ءِ گرسنگی دارگ بہ بیت۔ ارب ءُ مسلمان یک اَنت درسیں مسلماناں ھواری ءَ کار کنگ لوٹ اِیت ءُ چہ ایشی ءَ درس مسلمان گْوشگ بہ بنت۔

پہ اے گپ ءِ راست کنگ ءَ سی سال گْوستگ کہ ارب ازم ءُ اسلام دو جتا جتائیں لیکہ اَنت۔ اے جار پہ بازیں مردماں ھیرانی گپے اَت۔ آ ایشی ءَ سرپد اِت اَنت کہ ایسائیانی جنگ چون بیت ءُ ایسائیانی گون ءَ جنگ کنگ چے مانا دار اِیت۔ نوں آیاں وتی مزھب ترکاں رودرآتکی ترک ءِ راجدوستی ءِ نام دات کہ آیانی سر ءَ چہ شانزدمی دْھک ءَ بہ گر داں اولی مزنیں جنگ ءَ برجاہ اَت۔

اربانی گھگیری سک ءَ دگہ وڑ اَت آیاں زوت دربرگی اَت کہ درسیں مسلمان وت ماں وت بْرات نہ اَنت، ترک اَرب نہ اَنت، اے ھم زانگی اَت کہ جھان مزھب ءِ بنیاد ءِ نہ بلکیں باپاری ءِ بنیاد ءَ برجاہ اَت۔ ریاست ءُ ٹولی پہ وتی وت ماں وتیں نپاں نہ مزھب ءِ بنیاد ءَ نزّیکی کنگ ءَ اِت اَنت۔ اے ھم زانگی اَت کہ ارباں جھان ءِ بارو ءَ وتی لیکہ ءِ سر ءِ چمشانک دیگ ءُ وتی ایردستیں زندگی ءِ بارو ءَ سرپد بیگی اَت۔

پہ اے جیڑہ ءِ دیم ءَ آرگ ءَ دگہ ھچ وڑیں سْیاسی پارٹی کار کنگ ءَ نہ اَت، بزاں دمشک، کاھرہ ءُ بیروت ءِ مردم ٹولی اِت اَنت کہ ھمے گپ ءَ کنگ ءَ اِت اَنت۔اوٹمان آرمی ءِ رد ءَ ترک ورنایانی نام ءَ راجدوستیں سروکاں یک ٹولی یے جوڑ کرتگ اَت۔  اے سروگان چہ آدگہ ترکاں پمشیکا کمشرپیں نگاھے ءَ چارگ بوت اَنت کہ اے ‘آدگہ ترک ورنا” آدگرانی دست ءَ لٹ اِش وارینتگ اَت۔ اے شتگ اَنت 1901 ءَ گْوشتگ اش کہ آیاں راجی وتواجھی ءِ راھبندانی بنیاد ءَ بے بنھشتیں ریاست ءِ شوربندی رد کرتگ اَنت۔ ھمے سروگان، دانشور ءُ نودربراں ھمگْرنچیں مردماں پہ ارب ءَ مزنیں آشوبے آؤرتگ، ھمیشی ءِ آسر ءَ دمشک ءِ بنجاہ ارب ریاست 1920 ءَ دیم ءَ آتکگ۔

     روان اِنت۔۔۔۔۔۔۔