ندکار: سمُل بلوچ
ردی وَ بنی آدم ءِ دست ءَ بیت ءُ بنی آدم مُدام چہ دْراہ وتی ردیاں راست کنان ءَ دربرگ ءِ جُھد کنت۔ سک بژن اِنت کہ لھتیں بلوچ بلوچی دَرونتاں نہ وان اَنت، بے دَرونتانی وانگ ءَ دْراجیں نبشتانکاں رَد نبیس اَنت ءُ پد ءَ گْوش اَنت “منی نبشتانک ءَ راست بہ کن۔۔۔“
گُڑا ما اِے وڑیں بلوچاں دلبڈی دیگ لوٹ ایں کہ ما شُمئے رَدیاں وَ راست کن ایں، ما پہ شُمئے ھزمت ءَ مُدام ساڑی ءُ تیار ایں۔ چوناھا ما ھم لوٹ ایں کہ شما دْراہ راجی زبان ءِ آشوبی نبشتہ کار بِہ بَہ اِت ءُ بلوچی نبشتانکاں نبیسّان ءَ راج ءَ گلامی ءِ ھلاپ ءَ آگاہ بہ کن اِت۔ بلے شُمئے ھم یک زمہ واری یے ھست، باید اِنت شما ھم چہ وتی رَدیاں دربرگ ءِ جُھد بکن اِت، شما ھم وتی موبائلاں بلوچی کتاب سرپد بِہ بَہ اِت ءُ پیسر بلوچی دَرونت ءُ زُبان دوستی نبشتانکاں گوں دلگوش ءَ بہ وان اِت ءُ پد ءَ راجدوستی ءُ ڈیھ دوستی نبشتانکاں نبشتہ بکن اِت۔ وتی ھر ونتگین ءُ دربُرتگیں دَرونت ءَ دیم ءَ ھم بہ وانین اِت کہ چہ وانینگ ءَ ترا وتی ونتگیں مُدام یات ءُ تاجگ بنت۔ چوناھا بلوچی ھم گوں وانینگ ءَ دیمروی کنت۔
چہ درونتانی وانگ ءَ پد وھدیکہ شما نبشتہ کن اِت گُڑا وتی ھر نبشتگیں گالرِد ءَ یکبرے وت ھم چمشانکے بدے اِت ءُ راست کنگ ءِ جُھد بکن اِت، بلکیں ما گْوش ایں کہ دگرانی نبشتانکاں بہ وان اِت ءُ آیانی رَدیاں راست بہ کن اِت پرچا کہ ردیانی راست کنگ ءَ ما کم کم ءَ بلوچی نبشتہ بلد بَہ ایں۔ البت اگاں نبشتہ ءِ توک ءَ ردی یے ھست گُڑا ما وت راست ئِے کن ایں۔ ما شمئے ھر نبشتانک ءَ یک لبزانکی دروشمے دے ایں چوناھا یک دست ءَ چاپ نہ لگ ایت، داں وھدے کہ تو وت وانگ ءُ دربرگ ءِ جُھد مہ کن ئے گُڑا ترا مُدام کَس نہ وانین ایت ءُ دِگہ کَس تئی نبشتانک ءَ راست نہ کنت پمیشکا پیسر ترا وت وانگ ءُ راست نبیسّگ ءِ جُھد کنگی اِنت۔ پد ءَ ما ھم شُمئے نبشتانکاں، وان ایں، چار ایں ءُ راست اش کن ایں۔ اے وڑ ءَ نہ بیت کہ تو ھچ دَرونت ءُ راجدوستی نبشتانکاں نہ وان ئے، وت ھچ دربرگ ءِ جھد بہ کن ئے، مُدام رَد نبیس ئے ءُ ما تئی رَدیاں راست بہ کن ایں۔ زاناں شُما لوٹ اِت کہ یک آسانیں کارے گُران بہ بیت ءُ ھرکس تکانسر بہ بیت؟
چوناھا رَدی وَ ھرابیں چیزے، البت چہ رَدیاں دربرگ بنی آدم ءِ دیمروی اِنت پرچا کہ بنی آدم ءَ مُدام چہ وتی رَدیاں دربُرتگ۔ توری دُنیا ءِ ھر وڑیں وانِندھے بیت آ اول وتی نبشتگیں چیزاں دوبر وت وان ایت ءُ چمشانک دنت کہ آئی ءِ تہ ءَ Typomistake ءُ دِگہ شموشتگیں چیز ھوار کنگ بہ بنت۔ بزانکہ مارا ھیل کنگ لوٹ ایت کہ توری ھر وڑیں زُبان ءُ سبجیکٹے بہ بیت، ما لبزانکی پِڑ ءَ اشتاپ مہ کن ایں بلکیں چہ دُرستاں پیسر زُبان ءِ دَرونتاں بوان ایں، پد ءَ مُدام وتی نبیس اتگیں گالرِداں یکبرے وت وان ایں، آیانی رَدیاں راست بکن ایں ءُ پد ءَ شِنگ بِہ کن ایں۔
گوں شما دزبندی اِنت کہ پیسر بلوچی درونتاں بہ وان اِت۔ پد ءَ نبشتہ بہ کن اِت۔ سلامت بات اِت ءُ جُنزان بات اِت۔ زُبان دوست ءُ راجدوستیں بلوچ بات اِت، وت ماں وت تپاک، ھمکوپگ ءُ ھمدست بات اِت۔ بلوچ راج، بلوچستان ءُ بلوچی دیمروی بکنات۔ شالا سوبین بات اِت۔
