ندکار: ھانُل بلوچ
مرچاں دامگ ءُ گْوانکو ءِ زمانگ اِنت، ڈجیٹل دَور اِنت ءُ ھر لس مردم ءِ دست ءَ گْوانکو ھست بلے مئے راج ءِ تہ ءَ بازیں وانِندہ ھست اَنت کہ آیاں موبائل پہ گیم ءُ دِگہ بے سیتیں کاراں دستاں اَنت بلے ھمے موبائلاں پہ وتی راجی زبان ءِ وانگ ءُ دربرگ ءِ جھد نہ کن اَنت۔
روچے ءِ یک ساھتے ءَ ھم وتی راجی زبان ءِ درونتاں نہ کن اَنت۔ گِند ئے وت ھم نہ جیڑ اَنت کہ اِے موبائل یک شریں چیزے ءُ باید اِنت ما موبائل ءَ وتی راجی زبان ءِ کتاب سرپد بَہ ئے۔ بزانکہ موبائل یک ڈجیێل کتابے۔
اِے وَ تھنا پہ ٹِک ٹوک ءَ کارمرز نہ بیت بلکیں چہ ایشی ءِ سوب ءَ ما وتی راجی زبان ءِ وانگ ءُ نبیسّگ ءَ ھیل کت کن ایں۔ وھدیکہ ما آیاں پہ زُبان دوستی ءِ بابت ءَ یک دو گپ کن ایں کہ واجہ تو پرچا وتی راج زبان ءَ نہ وان ئے ءُ راست نبشتہ ئِے کُت نہ کن ئے؟ مرچاں بلوچ راج چہ پیسوب، یوٹیوب ءُ دِگہ جاھاں وتی راجی زبان ءَ وانگ ءُ دربرگ ءِ جُھد ءَ اَنت باید اِنت شُما ھم وتی راجی زبان ءِ وانگ ءُ دربرگ ءِ جُھد بہ کن اِت گُڑا وھد ءَ ھمراھی ءَ وت ھیل کن اِت۔ گُڑا گْوش اَنت “بلوچی ھما وھد ءَ دیمروی کنت وھدیکہ بلوچی چہ پرائمری ءَ ماں وانگجاھاں وانینگ بیت گُڑا ما بلوچی وان ایں”
بزانکہ اے وڑیں ناسرپدیں بْرات ءُ گْوھار گْوش اَنت کہ داں وھدیکہ بلوچستان آزات مہ بیت ءُ بلوچی ما وانگجاھاں وانینگ نہ بیت پمیشکا ما نہ وان ایں، وھدیکہ بلوچستان آزات بیت ءُ بلوچی ماں وانگجاھاں وانینگ بیت گُڑا ما پد ءَ پرائمری وانگجاھاں ایڈمیشن زُور ایں ءُ بلوچی وان ایں!
انی ایشاں کَے سرپد بہ کنت کہ تو یک گُلامیں راجے ئے ءُ ایران ءُ پاکستانی نہ لوٹ اَنت کہ بلوچ راج وتی راجی زبان ءَ بہ وان ایت ءُ بلوچی دیمروئی بہ کنت پمیشکا داں کہ بلوچ گُلام اِنت بلوچی ماں وانگجاھاں چہ پرائمری ءَ وانینگ نہ بیت۔ بچار کہ اگاں بلوچی ماں وانگجاھاں وانینگ نہ بوتگ یا وانینگ نہ بوگ ءَ اِنت گُڑا ایشی ءِ اِے متلب وَ نہ اِنت کہ ما وتی راجی زبان ءَ مہ وان ایں ءُ دربرگ ءِ جُھد ئِے مہ کن ایں بلکیں ھمے بہ جیڑ ایں کہ راج ءَ ماں وانگجاھاں پرچا بلوچی وانینگ نہ بوگ ءَ اِنت؟ پہ راج ءَ زبان ءِ ارزشت چے اِنت؟ زاناں مرچیگیں دور ءَ موبائل ءِ آسراتی زبان ءَ چے پائدگ دنت؟ گِند ئے ما دْراہ چہ وتی موبائلاں وتی راجی زبان ءَ وانان ءَ دربرگ ءَ ایں پمیشکا مرچی ھر بلوچ ءِ زمہ واری اِنت کہ وتی موبائل ءَ پہ راجی زبان ءِ واست ءَ کارمرز بہ کنت۔
ما وتی راج ءِ وانِندھیں بْرات ءُ گْوھاراں سرپدی دیگ لوٹ ایں کہ چہ دُرستاں پیسر دلپْروش مہ بَہ اِت کہ من پرچا بلوچی راست نبیسگ ءَ سُست آں۔ باید اِنت ما راج ءِ سرمچارانی وڑ ءَ وتی دل ڈڈ ءُ اے توکل کن ایں کہ من بلوچی دَرونت(سبق) ءُ راجدوستی نبشتانکاں وانان ءَ وتی راجی زبان ءِ راست نبیسی ءَ ھیل کن آں، بِل اِت کہ ھپتگے یا توری ماھے بہ لگ ایت۔ مارا دژمن ءَ اے باوری دیگ لوٹ ایت کہ تو بلوچی ءَ ماں وانگجاھاں وانینگ ءَ نیل ئے کہ بلوچ ءِ تہ ءَ زبان دوستی ءُ راج دوستی مہ بیت بلے ایش انت ما وتی راجی زبان وت وانان ءَ دربرتگ، ما ترا پْروش داتگ، ھزارانی کچ ءَ بلوچی زبان ءِ سرمچار ءُ نبشتہ کار ھست اَنت کہ آ انی آشوبی ءُ راجدوستی نبشتانکاں نبیسّان ءَ تئی ھلاپ ءَ راج ءِ تہ ءَ نپرت ودی کنگ ءَ اَنت۔
گِند ئے مارا وتی دزھُورکی ءِ وھد ءَ بلوچی دَرونت ءُ زُبان دوستی نبشتانک وانان ءَ وتی راجی زُبان دربرگ لوٹ ایت۔ شما وتی ماتی ءُ راجی زُبان ءَ وت ونت کن اِت، سرپد ھم بَہ اِت، اگاں تو بلوچی ونت کن ئے گُڑا اِے ھم پہ ما گنج اِنت۔ گِند ئے شمارا کَس نہ گْوش ایت کہ شما بلوچی ءِ دْراھیں دَرونتاں ماں یک روچے ءِ تہ ءَ بوان اِت یا شُما رَد نبشتہ بکن اِت۔ بلوچی مئے وتی جِند ءِ زُبان اِنت، وتی جِند ءِ زُبان پہ راجاں گِران ءُ مُشُکل وَ نہ بیت پمیشکا ما گوں شما دزبندی کن ایں پہ بلوچی وانگ ءُ دربرگ ءَ ھچبر اشتاپ مہ کن اِت، تھنا ھر روچ بلوچی ءِ یک درونت ءُ یک زُبان دوستی نبشتانکے بوان اِت پد ءَ شما وت یک ھپتگے ءِ تہ ءَ بلوچی راست نبیسّگ ءَ ھیل کن اِت۔
گُڈسری ما راج ءَ دلبڈی دے ایں کہ دلپروش مہ بَہ اِت، مُدام ءُ یکشل ءَ شوشل میڈیا ءَ وتی جِند ءِ زُبان ءَ پوسٹ بکن اِت، گوں وتی سنگت، دزگْوھار، سْیاد ءُ وارساں بلوچی ءَ کلوہ بکن اِت۔ بِل اِت رَد بہ بنت، دیم ءَ درونتاں وانان ءُ وھد ءِ ھمراھی ءَ شما وت بلوچی راست نبیسّگ ءَ زبر بَہ اِت۔ بزانکہ راجی زُبان ءِ دربرگ ءَ اشتاپ نہ لوٹ ایت بلکیں پہ لھتیں روچ ءَ وانگ ءُ دربرگ لوٹ ایت، زُبان دوستی ءُ راجدوستی ءِ مارشتاں لوٹ ایت۔ گُڑا باید اِنت ما پیسر بلوچی دَرونت، زُبان دوستی ءُ راجدوستی نبشتانکاں وانان کن ایں کہ گوں وانگ ءَ سرپدی رس ایت۔ یک گپے گْوش آں کہ بلوچی گوں انگریزی آباں نبیسّگ ءَ مارا ھچ پائدگ نہ رس ایت بلکیں بلوچی گوں انگریزی آباں نبیسّگ وھد ءِ زوالی اِنت پمیشکا ما گوں شما دزبندی کن ایں کہ بلوچی ءَ گوں انگریزی آباں نبشتہ مہ کن اِت بلکیں مُدام وتی راجی زُبان ءَ گوں بلوچی آباں نبشتہ بِہ کن اِت کہ شُمئے وتی زُبان ءَ آب ھست اَنت۔ اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔
مُدام بلوچی وانینگ ءِ جُھد بکن اِت کہ وانینگ ءَ مارا وتی ونتگیں درونت تاجگ بنت ءُ چریشی ءَ راج ءِ تہ ءَ بلوچی وانگ ءُ نبیسّگ ھم البار بیت۔ اُمیت اِنت کہ اے وڑ ءَ شما ھر یکے وتی راج ءِ نودربر ءُ وانِندھاں ھم سرپدی دے اِت کہ مارا بلوچی پیسبوک ءُ وٹس ایپی وانگجاھاں ھوار بیگی اِنت، وتی دزھُورکی ءِ وھد ءَ وتی راجی زُبان وانگ ءُ نبشتہ کنگی اِنت ءُ راج ھم وانینگی اِنت۔
سلامت بات اِت، شالا راجی زُبان ءِ جُھدکار ءُ ھزمتکار بِہ بات اِت، بلوچ راج شالا یکمُشت ءُ ھمدست بات، بلوچ ءُ بلوچی شالا دیمروی بکنات۔
