نمدی یے پہ ناسر پکیر ءِ نام ء

نبشتہ کار: مھر ساجدی

رمس: 3/11/2024

ساھت: 2:40

دْروت اَھد ءِ مُجاں گار ءُ بیگواھیں ناسر جان!

اے نِمدی ءَ کہ من نبشتہ کنگ ءَ آں اُمیت کناں ڈسّ ءُ نِشانے ءَ سر بیت ءُ کسے ءِ چمّاں کپ اِیت، باریں دست کپ اِیت یا نہ گْوشت نہ کن آں، بوت کنت تھاریں کوٹی ءِ دمکاں ترا کسے ھال بہ دنت کہ پہ ترا انگت وداریگ اَنت دل ءُ دیدگ۔

نیزگاریں ناسر جان!
مرچی تئی بیگوائی ءِ پَنچُمی رمس اِنت کہ اے ساھت گْوچ ئے پمّن آزمان نیستی یے، ءُ روچ ءُ شپ، گُلزمین بس ودار ءِ چار ڈسّ ءُ نشان اَنت۔ پرچا کہ کہ امروز ھما ساھت ءَ بچکندگانی گِدار ءَ کئیت کہ اُود ءَ مھروانیں ارمان ءُ ھمبل بہ اَنت۔ تئی جتائی ءِ ھر ساھت من ءَ اے اھوال ءَ دنت کہ یار تھنا تو نہ، بلکیں تئی وڑیں ھزاراں سر ھست اَنت کہ تھاریں کوٹیانی دیمپاناں، کس نہ زانت چون اِنت شُمئے زندمان۔

ارمان دیستگیں ناسر!
ھمے آیوکیں 1/1/2025 ءَ ترا شـش سال سـرجم بیت کہ انگت تو بیگوائی ءِ دریگ ءِ دپ ءَ نِشتـگ ئِے￸ کہ بلکـیں واتر بہ بہ ئِے￸۔ ناسر جان تئی ھـیال ءَ شش سال کـم اِنت کہ مردُمے بے گُناہ ءَ واتر مہ کنت؟، تئی پسّو من زاناں من ءَ سر نہ بیت، بلے اے من زاناں شش ساھت ءِ ارزشت چے اِنت۔ دِگہ اِستاناں شش ساھت ءِ بلاھیں ارزشتے شـش سال وتی جاگہ، بلے چے کنے تو زان ئِے￸ ءُ من زاناں پہ مارا زندمان گْران کنگ بوتگ ھمبل۔

ناسر جان!
تئی گریبی ءُ نیـزگاری ءَ ترا پہ لاپ ءِ شوھاز ءَ برے جاھے ءَ سر کُت، بلے ترا تئی کِسمت ءُ نسیب ءَ کُنڈ ملیر ءِ بھشتـیں سرگْوات نسیب نہ بوت۔ تئی جتائی ھمک بیگاہ گریشگ ءِ گزاں مُلور مُلور کنت۔ پہ تئی شوھاز ءَ تئی ھاوند ءَ دُرائیں میر ءُ سردار، ٹکّرئی ئیں مردمانی کِرّ ءَ دست شھار اِتگ، بلے انگت ھچ پہ ھچ۔

ناسر جان!
ھمے جنوری ءَ ترا شش سال سرجم ءَ بیت، تئی کھول ءِ مردماں باز تگ ءُ تاچ کُتگ ءُ انگت بزگ برے برے
کوئٹہ ، ھُزدار ، وڈّ ءُ مشکے ، دگہ جاھاں پٹ ءُ لوٹ ءَ میر ءُ سردارانی کِرّ ءَ رو اَنت، بلے تئی پیریں مات ءَ را بس دُروگیں تسلّا دست کپ اِیت۔

مھروانیں ناسر جان!
اے چاریں لبزاں من یک نِمدی یے ءِ دْروزشم ءَ پہ ترا نبشتہ کـــنگ ءَ آں۔