نِبشتہ کار: کوھی بلوچ
مرچی بلوچ جُھد ءِ آجوئی گوں تْرندی ءَ دیم ءَ جُنزگ ءَ اِنت، جُھد ءِ دیم ءَ بروک بلوچ راج اِنت، کہ نہ شپ چار ایت ءُ نیکہ روچ چار ایت ءُ نیکہ شُد ءُ تُن چار ایت، اے جُھد ھما بچانی کوپگ ءَ اِنت کہ آھاں گوں زمین ءَ مِھر اِنت، وتی گُلامی اِش مار اِتگ، بزگی اِش دیستگ، وتی مکھیں مات ءُ گُھار اِش ماں دگانی سر ءَ دیستگ انت، وتی بے سواس ءُ دِرتگ پُچیں چُک اِش ماں بزگی ءَ دیستگ اَنت، وتی ھمبل اِش دیم پہ دیم شھید بوگ ءَ دیستگ اَنت ءُ آجوئی ءِ بام ءِ اِستال اِش نزدیک ءَ دیستگ اَنت۔
مرچی بازیں مردم ھمے ھبر ءَ کنگ ءَ اِنت کہ ”بائدگ انت بلوچ وتی بلوچ راج ءَ مہ کُش ایت“ بلوچ ءَ ھِچبر وتی بلوچ راج نہ کُشتگ، اے جنگ اگاں مرچی بلوچ راج ءَ وتی کوپگاں کُتگ تُن ءُ شُد سگگ ءَ اِنت گُڑا اے جنگ پہ ھما بزگیں راج ءَ اِنت کہ گُلام اِنت۔ اگاں بلوچ سرمچار یک بلوچے کُش ایت گُڑا اے ھما بلوچ اِنت کہ بلوچ راج ءِ دُژمن انت، دُژمن بلوچ ءِ بیت یاکہ دَری راجے ءِ۔۔!
بلوچ سرمچار ھِچبر وتی راج ءَ پہ بزگی ءَ چار اِت نہ کنت پرچاکہ اے جنگ پہ راج ءَ اِنت، اگاں مرچی یک سرمچارے گوں دُژمن ءَ دیم پہ دیم اِنت وتی جان ءُ مال ءَ کُربان کنگ ءَ اِنت گُڑا پہ کے۔؟ پہ ھمے راج ءَ کہ گُلام اِنت، پہ ھمے راج ءَ مرچی دگانی سر ءَ پہ وتی گار ءُ بیگوھیں بچانی شوھاز ءَ کوکار کنگ ءَ انت ءُ پہ ھمے راج ءَ کہ پہ دپارے نگن ءَ در پہ در اِنت۔
مرچی پندل سازیں دُژمن ھمے لوٹ ایت کہ بلوچ وتی بلوچیں برات ءِ دست ءَ بہ مِر ایت دانکہ منی کوپگ آسودگ بہ بیت ءُ منی بوج کم بہ بیت، گُڑا بلوچ راج ءَ را مرچی اے دروگیں پندل ءُ اے ھبر زانگ لوٹ ایت کہ دُژمن ھِچبر نہ لوٹ ایت کہ تو اے زمین ءِ سر ءَ ھست بہ بہ ئے، تئی راج ھِچبر تئی دُژمن نہ اِنت، ھنچوکہ مرچی منی ءُ تئی زمین اِش بھر ءُ بانگ کُتگ اے زوراکیں دُژمن ھمے لوٹ ایت کہ من ءُ تو ھنچو بھر ءُ بانگ بہ بہ این ءُ منی تئی نام اے جھان ءَ مہ مان ایت۔
زوراک ھر وھد ءَ گُلامیں راج ءَ را چہ وانگ ءُ زانگ ءَ چے دور کنت، آئی ءِ زبان ءَ پچ گیپت، آئی ءِ دود ءُ دودمان ءَ مٹ کنگ ءِ جُھد کنت، آئی ءَ را گوں زَئی ءُ زئیاں بندوک کنت ءُ آئی ءَ را پہ نیکراہ(مزہب) میڈین ایت، گُڑا من ءَ ءُ ترا اے دروگیں ھبر ءُ پندل زانگی انت اے پندل پھمگی انت.
بلوچ ءِ دُژمن ھما اِنت کہ بلوچ ءِ مال ءُ مڈیانی لُٹ ءُ پُل ءَ وت ءَ گوں دُژمن ءَ ھوار کنت، بلوچ ءِ دُژمن ھما اِنت کہ جُھدے آجوئی ءِ دیم ءَ اوشتوک اِنت، بلوچ ءِ دُژمن ھما اِنت کہ بلوچ ءَ دیمروی ءَ نئیل ایت ءُ بلوچ ءِ دُژمن ھما اِنت کہ گوں زوراک ءَ ھوار اِنت بلوچ ءِ چُکچینی ءَ کنت، پہ بلوچ ءِ چُکچینی ءُ بلوچ ءِ مال ءُ مڈیانی لُٹ پُل ءَ ھرکس کہ ھوار اِنت گُڑا بِزاں کہ بلوچ ءِ دُژمن انت ءُ بلوچ اے دُژمناں ھِچبر نہ بکش ایت۔۔
