نبشتہ کار: چیپ اسلم بلوچ
اے راجی زْرمبشت ءُ جنگ ءَ ھزاراں سنگتاں گوں یکجاھی ءُ پد ءَ آیانی نمیران ءُ زندانی بوگ دل ءِ اندر ءَ مزنیں دردے کہ مارگ ءَ ابید کدی درشانگ نہ بیت، پمیشکا مزنیں مُدّتے ءَ پد من نوں کلم زُرتگ ءُ وتی بے مٹّیں ھمبل ءُ بلوچ نیشنل موومنٹ ءِ نمیرانیں رھشُون ، کواس ءُ زانتکار اُستاد اَلی جان ءِ سر ءَ کسانُکیں یاتے نبیسّگ ءَ آں ، بلکیں اے ابیدے یاتے ءَ دِگہ ھِچّے نہ اِنت۔ چی ءَ کہ اُستاد اَلی جان ءِ اِلم ءُ زانت ، سیاسی ءُ راجی بودناکی ءِ سر ءَ نبشتہ کنگ پمّن سکا مشکل ءُ گْران اِنت ، من بس وتی کسانیں یات ءُ یکجاھی ءِ تْرانگے نبشتہ کنگ ءَ آں۔
اے درگت ءَ منی ءُ اُستاد الی جان ءِ گِند ءُ گدار دو هزار نُھ (2009) ءَ ماں راجی جُز ءِ ابدمانیں سر رزا جھانگیر ءُ زندانی ئیں سنگت شبیر لکمیر ءِ باگیں بُندر گُلیں آواران ءَ بوت۔ اے وھد ءَ ڈاکٹر منّان آواران ءَ پارٹی ءِ کارانی درگت ءَ تر ءُ تاب ءَ اَتکگ اَت ، ءُ ملنگ تبیں جُھدکار اُستاد الی جان واجہ ڈاکٹر منان جان ءِ ھمراہ اَت۔
ھمے رنگ ءَ ملنگ تبیں جُھدکار اُستاد الی جان کہ من اولی رند ءَ دیست اجکّا ءُ ھیران بوت آں کہ اے چونیں سنگت ئِے، کْوھنیں پُچ ءُ دِرتگیں چادر ، سِستگیں چَوَٹ۔ من وتی دل ءَ گْوشت بلکیں اے انچائیں سنگتے ڈاکٹر منان جان ءِ ھمراہ اِنت ، بلے داں چار ءُ پنچ روچ ءَ آواران ءَ گوں ڈاکٹر منان ءِ ھمراھی ءَ پارٹی ءِ سنگتاں مجلس ءُ دیوان کُرت۔ ھمے مجلس ءُ دیواناں پد من دیست کہ اے ملنگ تبیں بنی آدم اِلم ءُ زانت ءِ یک دریایے ، یک آلمیں مردُم ئِے۔
پارٹی ءِ مجلس ءُ دیواناں پد ڈاکٹر منان جان ءُ اُستاد الی جان واتر دیم پہ باگیں جاہ ء آھو (جھاؤ) ءَ شُت اَنت، ءُ من وتی ھلک ءِ نیمگ ءَ واتر کُت۔ وھد گوں تْرندی ءَ دیم ءَ روان اَت ، دو ھزار دہ (2010) ءَ من پاٹی ءِ کونسل سیشن ءِ تیاری ءِ وھد ءَ گوں ملنگیں الی جان ءِ ھمراھی ءَ جاہ ء آھو (جھاؤ) ءَ بازیں وھدے گْوازینت۔
چر اے یکجاھی ءَ پد من سما کُت ءُ مار اِت کہ اے ملنگ تبیں بنی آدم ھر مردم ءِ تب ءُ میل زانت ، ءُ ھر مردم ءَ را آئی تب ءُ میل ءِ رِد ءَ پارٹی ءِ کار ءُ راجی جُنز ءِ درگت ءَ مبلائیز کُرت۔ چہ اُستاد اَلی جان ءِ ھمے مھروانی ءَ جاہ ء آھو (جھاؤ) ءِ لس مھلوک ءَ آئی ءَ را بے کساس مھر ، اِزت ءُ شرپ بکش اِت۔ ھمے کونسل سیشن ءَ اُستاد الی جان پارٹی ءِ بُنجاھی کمیٹّی ءِ باسک گچین کنگ بوت ، من ھم بُنجاھی کمیٹّی ءِ گچین کنگ بوت آں۔
اے سپر ءِ بندات بوگ ءَ ھوار منی ءُ اُستاد الی جان ءِ سنگتی گیشتر مھکم بوت ، چہ سیشن ءَ رند ھرکس ھرکس بوت ءُ دیم پہ وتی ھلک ءُ دمگانی نیمگ ءَ شُت اَنت۔ پاٹی ءِ کار ءُ زمہ واری ، ھرکس وتی کاراں ھمگْرنچ اَت ، ءُ اُستاد الی جان ھما سنگت اَت کہ آئی ءَ را گوں وتی پارٹی ءِ کارانی سرجم کنگ ءُ کتاباں گوں سکا باز مھر اَت۔
کسے ءَ کہ آئی ءَ را دیستگ بے کتاب نہ اَت ، اگاں یک نوکیں کتابے آئی ءَ دیست تاں وانگ ءَ ھلاس نہ کُرت ئِے گُڑا کتابے ایر نہ کُرت۔ اُستاد الی جان وت گْوشت کہ: ” شپ ءِ داں ساھت دوزدہ (12) ءَ چراگ ءِ دیم ءَ نشتگ ءُ واناں، سُھب ءَ مھلہ پاد کایان ءُ رواں وتی وانگجاہ ءَ نودربراں وانین آں “۔
اُستاد الی جان ھما سنگت اَت کہ پُچ ءُ پوشاک ، شوک ءُ ٹھل ءِ مردمے نہ اَت ، بلکیں آئی مُدام وت ءَ چہ دْرستیں سنگتاں جھل ءُ کستر لیک اِت۔ پرچا کہ آشوبی ءُ راجی جُھد ءِ تہ ءَ مردم چہ وتی کرد ءِ تہ ءَ مزن بیت ، چہ ایمانداری ءَ مزن بیت ، ناں کہ پُچ ءُ پوشاک ، شوک ءُ ٹھل مردم ءَ مزن کن اَنت۔
استاد الی جان شکرین (شوگر) ءِ نادْراہ بوتگ ، بلے آئی ءَ پہ پارٹی ءِ کارانی واستا وتی نادْراھی نہ چار اِتگ۔ من ءَ یات اِنت ما سنگت یکجاہ نشتگ اَت اِیں گُڑا الی جان وتی شکرین ءِ درمان وارت اَنت۔ ھمد ءَ یک سنگتے ءَ گُْوشت: ” الی جان ترا اے شوگر ءِ نادْراھی کُش اِیت ، مارا پاکستان ءِ پوج کُش اِیت “۔
گُڑا مھروانیں اُستاد الی جان ءَ کند اِت ءُ گْوشت: ” ھرچی اللہ بہ زانت ، بلے من وشنامیں مرگے لوٹ آں “۔
ھمے رنگ ءَ اُستاد الی جان لبزانک دوستی ءُ نبشتہ کاری ءَ ابید شائر تبیں اِنسانے بوتگ ءُ کم کمیں شائری ھم کُرتگ۔ اے درگت ءَ آئی ءِ شائری ءِ نام ” الی جان اُلپت “ بوتگ ، ءُ اُستاد اَلی جان یک آرٹسٹ ءُ اکسکارے ھم بوتگ۔
اُستاد الی جان کہ کسے ءَ نہ دیستگ اَت، اگاں آئی ءَ اولی رند ءَ بہ دیستیں گُڑا نہ زانتگ اَت ئِے کہ کواس ءُ زانتکاریں اِستاد الی جان اِیش اِنت ، پرچاکہ اُستاد الی جان ملنگ تبیں اِنسان ءُ آشوبی چیدگے اَت۔ دِرتگیں چادر ، سِستگیں چَوَٹ ءُ کلنڈیں پرپٹ ءِ واجہ اُستاد الی جان ءَ بلاھیں اِلم ءُ زانتے گون اَت۔
من ءَ یات اِنت من ءُ اُستاد الی جان چہ جاہ ء آھو (جھاؤ) ءَ پہ آواران ءَ پہ پارٹی ءِ کارانی بابت ءَ تر ءُ تاب ءَ اتکیں ، گُڑا یک روچے ما ترتیج ءَ سنگتانی چارگ ءَ شُت اِیں۔ گوں سنگتاں دیوان کُرت ، ھمے وھد ءَ ترتیج ءِ وانگجاہ ءَ بی ایس او ءِ سنگتاں یک لائبریری یے پچ کُرتگ اَت، ءُ اے لابرریئری رزا جھانگیر ءِ جُھدانی بروَرد اَت۔
ءُ اے لائبریری شھید سھراب ءِ نام ءِ سر ءَ اَت ، مارا سنگتاں ھمے لائبریری ءَ بُرت۔ زھور بلوچ (شھید بالی) مئے ھمراہ اَت، ما کہ لائبریری ءَ شُت اِیں گُڑا زھور جان اُستاد الی جان ءَ گْوشت: ” بہ چار واجہ کُجام کتاب ءَ وان ئے؟ ترا دْراھیں کتاب دست کپ اَنت “۔
چار ءُ پنچ الماری چہ کتاب ءَ پُر اَت، اُستاد الی جان ءَ کتاب چاران کُت اَنت۔ ھمے چارگ چارگ ءَ دو کتاب کش اِت ءُ گْوشت ئِے: ” اے دوھیں کتاب من نہ ونتگ آں، آ دِگہ دْراھیں کتاب ونتگ اَنت “۔
زھور شھید بالی ءَ گْوشت: ” تو دْراھیں کتاب ونتگ اَنت ؟ “۔
مھروانیں اُستاد اَلی جان ءَ گْوشت: ” ھو! اے سرجمیں کتاب من ونتگ اَنت “۔
چوش کہ اُستاد اَلی جان سیاست ءُ لبزانک ءَ ھوار یک چاگِردی پُرکاریں جُھدکارے ھم بوتگ ، آئی گوں وتی راجی سِنچ ءُ زانت ءَ چاگِرد ءِ بازیں جیڑہ گیشوار ءَ مھلوک ءِ ھیال ءُ آجوئی ءِ جُھد ءِ نیمگ ءَ ترّینتگ۔ ھمے وڑ ءَ اُستاد اَلی جان ءَ جاہ ء آھو (جھاؤ) کوھڑو یک درسرکاری وانگجاھے ھم بوتگ کہ بیگاہ ءِ وھد ءَ نودربراں ونتگ ءُ آ ھمے ملنگیں بنی آدم ءِ جُھدانی برورد بوتگ۔ کتاب چہ وتی زاتی ھرچ ءَ پور ءَ کُرتگ اَنت۔
ھمے رنگ ءَ نبشتہ کاری ءِ پڑ ءَ اُستاد الی جان ءِ ند نام هونک بلوچ بوتگ ، یک رندے من اُستاد ءَ را جُست کُرت کہ ترا هونک ءِ نام زان ءَ دوست بیت کہ تو وتی ند نام کُرتگ؟
اُستاد ءَ گُڑا پسّو دات ءُ گْوشت: ” هونک منی پیرُک ءِ نام بوتگ ، ءُ من ءَ سکا دوست بیت “۔
اُستاد ءِ ھمے جُھد ءُ جپاھانی سبب ءَ جاہ ء آھو (جھاؤ) ءِ تہ ءَ پارٹی ءِ کار روچ پہ روچ ءَ مھکم بوان اِت اَنت ، مبلائیزیشن ، مراگش ءُ نیاد برجاہ اِت اَنت ، پمیشکا پاکستان ءِ پارلیمٹ پرست ءُ بلوچ راج ءِ دلاراں اُستاد الی جان ءِ وڑیں کواسے برداشت کُرت نہ کُت۔ ریاست ءِ تولگیں لشکر ءَ 19 اپریل 2013 ءَ اُستاد الی جان ءِ گِس جاہ ء آھو دارو کوچک ءَ بیڑ بُرت کہ من آئی ءَ دزگیر بہ کناں ، بلے اُستاد الی جان بھادُری ءُ جوان مردی ءَ گوں دُژمن ءَ دیم پہ دیم بوت ءُ دائمی ابدمان بوت۔
