راسکوہ ءِ شھزادگ ھشتمی بھر نبشتہ کار ھلیل بلوچ

اے کور ءُ کورجو

اے کلّگ ءُ ڈنّ

اے پیش ءُ پیشبند ءُ کُل ءُ کاپر

گیاب ءُ کیلّگ

اے کھن ءُ بانڈم

کپوت ءُ شانتُل

سمین ءُ بُلبُل

 اے کوہ ءِ سنگر

اے راہ ءِ چیدگ

زمین ءِ وارس

منی گواہ اَنت

نہ تتکگاں من چہ جنگجاہ ءَ

ھمے کوہ ءُ تلار اِت اَنت ، شورّ ءِ چُرّ ءُ شیپ اِت اَنت ، کے ڈی ءِ کندگ ءُ ٹھکانی جکسگ اَت۔ برے یک نیمگے کے ڈی کارانی واستا درکپت ، چوشیں وھد ھچ نیاتک کہ کارے ءِ نام بوتیں کے ڈی مکن کتیں۔ کسّے ءِ پگر ءُ لیکہ ھرچُنت (ھرچینکہ) زیات مھکم بیت آئی ءِ کار ءِ ھب ءُ واھگ ھمینچو گیشتر بیت۔ آ مدام گوں دل ءِ ھب ءَ کار ءَ اَت ، پمیشکا شش ماہ نہ گْوستگ اَت کہ براہوئی ءَ بلد بوتگ اَت۔ ما دْرست ھیران اَت اِیں کہ براہوئی چو گْران اِنت ایشی چون ھیل کرتگ۔

کے ڈی مدام چہ اوتاگ ءَ دور اَت ، برے دو ماہ برے ماہ ءِ سر ءَ گوں یک سنگتے ءَ چُرّانی تہ ءَ پہ کارانی واستا نندوک اَت۔ راستی ءَ بہ گْوش آں یک سنگتے ءَ گوں اینکس وھد چہ اوتاگ ءَ دور بوگ من ءَ ھچ وش نہ بیت ، ءُ من سک بے تاھیر بہ آں۔

یک رندے من ءَ لھتیں سنگت گون اَت من پہ کارے ءَ درکپت آں ، گڑا کے ڈی ءِ نیمگ ءَ ھم منی روگ بوت۔ من چاراں کے ڈی براہوئی ءِ تہ ءَ گپ ءَ اِنت۔ من سوج کرت اڑے تو شہ کج ءَ براہوئی ءَ زان ئے؟ گْوشت ئے” ھمد ءَ ھیل کرتگ۔” من ءَ باور نہ بوت من ھمے پھم اِت کہ منی وڑ ءَ کالج ءُ یونیورسٹی ءَ سنگتے براہوئی زبان ءِ بوتگ اَنت پمیشکا زانت۔

واتری ءَ ھمے گپ من گوں بارگ ءُ ملا جان ءَ جت آ ھم ھیران بوت اَنت۔ بارگ گْوشت من ءَ انچو (اینکہ) سال اِنت اے ھند ءُ دمگ ءِ تہ ءَ ، من انگت پہ گُنگی ھبر کن آں۔ ملا و براہوئی ءِ الپ ءُ ب ءَ نہ زانت ، اے رگو چون ھیل کرت۔ ابیدے زبان ئیگ ءَ مردم گُنگانی تہ ءَ شمار بیت ، کے ڈی مدام کارانی تہ ءَ اَت۔ پمیشکا آئی ءَ وتی گُنگی زبان پر کتگ اَت ءُ راجی کاراں دیم ءَ بران اَت۔

یک رندے سنگتے ءِ آرگ ءِ واستا من ءَ روگی اَت ، گُڑا من آئی ءَ را گوں وت ھمراہ کرت۔ آئی ءِ ٹِکانھے ءَ ما شپ ءَ داشت ءُ سھب ءَ من تھنا در کپت آں ، ءُ آئی ءَ را تھنا ھمے کوہ ءُ اگارانی تہ ءَ پہ ما ودار کنگی اَت۔ منی درکپگ ءَ گوں ھمے ھند ءَ لشکرکشی (فوجی آپریشن) بندات بوتگ اَت ، اے وھد نیٹ ھم پاکستان ءَ بند کتگ اَت کہ کے ڈی من ءَ ھال بہ دنت۔ من شت آں ، سنگت من ءَ گون اَت شام ءِ وھد ءَ من واتر ٹِکانہ ءَ سر بوت آں چاراں کے ڈی مزنیں کوہ ءِ ٹُل ءِ سر ءَ چہ ایر کپگ ءَ اِنت۔ چوشیں مزنیں لشکرکشی ءِ تہ ءَ گوں سبر ءُ برداشت ءَ نِندگ ، تیوگیں راہ ءِ چار ءُ دلگوش کنگ یک مزنیں گپے ، بلے آئی ءِ تہ ءَ پیسلہ کنگ ءِ تاکت ھست اَت۔ آئی ءَ زانتگ اَت کہ سنگت کا اَنت۔ پد ءَ ھما کے ڈی اَت ھر کار ءِ دیم ءَ مدام چہ اوتاگ ءَ دور اَت، برے یک سنگتے ءَ گوں برے دو سنگت ءِ ھمرائی ءَ۔

لھتیں وھد ءَ پد 2017 ءَ بارگ پہ کارے ءَ شتگ اَت ءُ چہ ھمود ءَ دلجان ءِ نیمگ ءَ۔ کے ڈی ءُ دگہ سنگتے مدامی وڑ ءَ چہ اوتاگ ءَ دور پہ کارانی واستا پند ءُ بزّگی ، واری ، گژن ءُ تن سگّگ ءَ اِت اَنت۔ گُڑا سنگتاں من ءَ دیم دات ھما نیمگ ءَ کہ برو کے ڈی زی ءِ کُمک بہ ئے ، وھدے من آوانی ٹِکانہ ءَ آھت آں آوانی بزگی من دیست من ءَ ھچ باور نہ بوت کہ اے چون زندگی کنگ ءَ اَنت۔

روان اِنت۔۔۔