اے ھبر راستے کہ من ءَ گوں تو مھر اِنت ، انچو کہ شانتل ءَ را گوں وتی کدو ءُ زھگاں مھر اِنت ھمے وڑ ءَ من ءَ گوں تو مھر اِنت۔ بلے من ستر بہ گْوش آں کہ چہ من گیش ترا کس مھر دات نہ کنت گڑا اے ھبر دروگے ، پرچا کہ اد ءَ ھزار ءُ لکانی کساس ءَ سرمچنڈ ءُ تمردیں ورنا ھست کہ ترا گوں مھر کن اَنت ءُ انگت کنگ ءَ اَنت ءُ کتگ اِش ، بلے ھما سرمچنڈ ءُ تمردیں ورنا کہ زیکیں روچ کربان ءُ مروچی پہ تو کربان بوگ ءَ اَنت ، من گْوش آں کہ تئی ھاک ءِ گْواچنیں وارس ھما گْوشگ بہ بہ اَنت۔ پرچا کہ یک مردمے وتی زند ءِ سرجمیں وشیاں پہ تو یل بہ دنت ءُ درانڈیھ بہ بیت ، وتی مات ءُ گْوھار، کلیں واھگ ءُ واھشتاں بہ شموش اِیت ءُ پہ تو وتی سر ءُ ساہ ءَ نْدر بہ کنت ، دگہ مھر چے بوت کنت۔
مروچی تئی مھرانی موکگ ءَ اے دابیں سرمچنڈ ءُ تمردیں ورنا ءَ چہ مئے چاگرد سریچ اِنت۔ ھما کہ پہ وتن ابدمان بوتگ اَنت ءُ یک شرپداریں نامے کٹ اِتگ ، چہ ھما تمرد ءُ لکی ئیں سراں شھید گلام مھمد بلوچ ، شھید لالا منیر ، شھید بالاچ مری ، شھید جلیل ریکی ، شھید کمبر چاکر ، شھید الیاس نذر ، شھید نواب اکبر جان بگٹی ، شھید میجر پیرک ، شھید میجر ملا بھرام ، شھید میجر آسمی وفا ، استاد اسلم بلوچ ءُ دگہ ھزاراں پسگ اَنت ، بلے استاد اسلم ءِ نام ازرتانی تہ ءَ شمار بیت۔ پرچا کہ ازرت ابراھیم ءَ وتی زھگ ءِ کربانی دیگ ءِ واب دیستگ اَت ، بلے استاد اسلم ءَ وتی زھگ ( شھید پدائی ریھان جان ) گوں وتی مبارکیں دستاں بیرک کوپگاں دات ءُ دیم پہ پدائی ءَ روان دات۔
اگاں انوگیں شھیدانی ءَ لڑ ءَ کائے گڑا شھید گرو جبار مدام پہ وتی آیوکیں پدریچ ءَ چیزے نہ چیزے ءِ ٹھینگ ءِ جھد ءَ اَت ، کج ءَ نہ کج ءَ داں رستریں دژمن ءَ پروش بہ دنت۔ ھمے وڑ ءَ وتی نوک اتکگیں ورنا انچو جوڑ کرتگ اِت اَنت کہ باند ءَ روچ من بہ آں یا نہ بہ آں ، بلے منی مکسد بہ بیت۔ منی جھد دیمروئی بہ کنت۔
اے کل کہ شھید بوتگ اَنت ، کل گوں مھرے ءَ بندوک بوتگ اَنت۔ کلاناں گوں گلزمین ءَ مھر بوتگ ، انگت ھم چوشیں مھر دیوکیں سرمچنڈ ھست ءُ سلامت اَنت کہ وتی مھکیں مات ءَ مھر بہ دئے اَنت۔ چر ایشاں یک گنوکے من آں کہ گوں تو مھر اِنت ، دانکہ ساہ مان اِنت مھر برجاہ مان اِیت۔ تئی ھاک ءِ وشبو ءَ ھوار بہ آں ، تئی دلبند ءَ کبر بہ آں ، تئی بوہ ءُ باساں گوں ھوار ءُ گوات ءِ چنکاں آتار بہ آں۔ پرچا کہ من ءَ گوں تو مھر اِنت ، ءُ ھمے مھر منی زندمان۔
