مھکمیں ورنا شھید پدائی جمال شاد پنام کمبر مھروان

نبشتہ کار: سرباز وپا

چاردمی بھر

جاہ ءِ آھو شھید واجہ ڈاکٹر منان جان ءُ زور بیگواھیں چیئرمین زاھد بلوچ ءِ دوستیں ھند بوتگ ، آیاں بلوچستان ءِ آدگہ ھند ءُ دمگاں ترّ ءُ گرد کرتگ بلے آ گیشتر جاہ ءِ آھو ءَ بوتگ اَنت۔ اگاں کسے شھید واجہ ڈاکٹر منان جان ءُ چئیرمین زاھد ءَ گیرکار اِیت گڑا آیانی سیاسی دیوان ءُ کتاب وانگ ءِ سکین الم  ءَ یات کا اَنت۔

جاہ ءِ آھو ءِ وڑیں چہ زند ءِ درسیں آسراتیاں زبھر ءُ بے وانگجاھیں ھندے ءَ سیاسی راھبندے دیگ ءُ آشوب ءِ پُر زور کنگ ءَ شھید واجہ منان جان ءُ چئیرمین زاھد ءِ بلاھیں کردے بوتگ۔

آجوئی جز ءِ پڑ ءَ بلوچستان ءِ ھمک ھند ءُ دمگاں گھگیری کنوکیں بامردانی تہ ءَ سیاسی دیوان ھست ءُ برجاہ اَنت۔ چوش کہ جاہ ءِ آھو منی ھند اِنت ، من جاہ ءِ آھو ءِ بارو ءَ گیشتر سرپد ءُ گوست ءَ دیستگ ءُ سنگت انگت ءَ ھم گوں پابندی ءَ وتی کتاب وانگ ءُ سیاسی دیوان برجاہ داشتگ اَنت۔

شھید پدائی جمال شاد پنام ء کمبر مھروان ءَ وتی وانگ ءِ دْرچ کدی ھم نہ پروشتگ ءُ برجاہ داشتگ۔ چونیں کہ ناگیگیں جاور بوتگ اَنت ، اگاں آ کمو گیگ بوتگ گڑا آئی پہ کتاب وانگ ءَ الم وھد کش اِتگ۔ وانگ ءِ ھواری ءَ آئی گوں سنگتاں سیاسی ھیلکاری دیوانانی بارو ءَ گپ جتگ ءُ وانگ ءِ سکین داتگ۔ سنگتان ءَ سیاسی سرکلانی پابند کنگ ءِ جھد کرتگ۔

ھمے وڑ ءَ 2017 ءَ وھدے کہ جاہ ءِ آھو ءَ جنگولیں بامردمانی کاروائی تْرند بوت اَنت ، تھنا جاہ ءِ آھو میتگ زیرکانی زورگریں پاکستانی لشکر ءِ کاروان ءِ سر ءَ دو پد ما پدیں ارشاں یک پوجی کپٹنے مرت ءُ کرنلے ٹپی بوت۔ اے ارش پاکستانی لشکر ءَ رسانکدر ءَ وت منّ اِت اَنت ، بلے آدگہ کسان ءُ مزنیں ارش ھسابی نہ اِت اَنت۔
پمیشکا جاہ ءِ آھو ءِ برزی ھند کورک ءَ پاکستانی لشکر وتی بنجل (کیمپ) ءِ یل کنگ ءَ لاچار بوت۔ ھمے جنگانی میان ءَ بی ایل ایپ ءِ جنگولاں آواران لسبیلہ شھدگ ءَ جاہ ءِ آھو دار ءِ کنڈگ ءِ بن ءَ پاکستانی لشکر ءِ کاروان ءِ سر ءَ تْرندیں ارشے کت ، اے ارش ءِ آسر ءَ آدگہ تاواناں ابید یک پوجی بکتربند گاڑی یے تباہ بوت۔

پاکستانی لشکر ءَ یک رندے پد ءَ وتی زوراکی تْرند کرت اَنت۔ گوں بازیں کچے ءَ اتک ءُ کوھڑو ءَ نشت۔ اے وھد ءَ جاہ ءِ آھو برز ءَ موبائل نیٹورک نیست اَت، کورک ءُ پیلار ءَ کشندہ ٹولی سک سرگرم اَت۔ چہ کوھڑو ءَ جھل ءَ سرجم ءَ لشکر نشتگ اَت ءُ ھمک روچ کوھانی راھاں بندگ ءَ اَت۔ کوہ ءَ لنگڑی ءَ ھم زور داتگ اَت۔

28 اکتوبر 2017 ءَ وھدے کہ سنگت پہ راشن ءِ رند ءَ کوچگ ءَ ایر کپ اَنت ، پاکستانی لشکر ءَ دو سنگت کماندار اللہ بکش آجز پنام ء بشام ءُ ابدل رازک پنام ء کھور جان شھید کرت اَنت۔ لشکر یکشل ءَ راھاں بندگ ءَ اَت۔

سنگتاں ھمے سوڑگ کرتگ اَت کہ اے وھد ءَ مئے کمیں سنگت سورگر ءِ کوہ ءَ بہ بیت ءُ آدگہ سنگت کشگ بہ بہ اَنت۔ لنگڑی ءَ ابید سارتی ھم گیش بوگ ءَ اَت۔ چہ سنگتاں گیشتری بھر جھل جاہ ءِ آھو ءَ شتگ اَت۔ پاکستانی لشکر یکشل ءَ رندگیری کنان ءَ روگ ءَ اَت۔ 13 نومبر 2017 ءَ پاکستانی لشکر ءَ سنگتانی بندرے (کیمپ) ءَ بیڑ برتگ اَت ، دگہ دو ھمبل ھان جان ءُ سولان شھید بوت اَنت۔
بلے زورگریں لشکر وتی گڈی زور ءَ چکاسگ ءَ اَت ءُ لشکرکشی یکشل ءَ برجاہ اَت۔ 28 دسمبر 2017 ءَ لشکر ءَ پد ءَ ارشے کرتگ اَت ، اے ارش ءَ لشکر ءَ تاوان وارتگ اَت ءُ سنگت در آھگ ءَ سوبین بوتگ اَنت۔

لنگڑی ءُ کھرمانیں زمستان ءِ سارتی یکشل ءَ برجاہ اَت اَنت ، ھمے برپ بستیں سارتی ءِ تہ ءَ آیان ءَ یک ءُ دو ترندیں ھور ءُ شلگاں ھم گپت۔ بہ گند ئے اے لبزانی نبشتہ یا وانگ ارزان اِنت ، بلے اے ساھت سکا گْرانیں ساھت بوتگ اَنت۔ شھید پدائی کمبر جان چہ درساں کستریں سنگت بوتگ ءُ ھمبلانی ھمراہ بوتگ۔ اے درسیں ساھتاں آئی ٹھک ءُ کندگ برجاہ بوتگ اَنت ءُ ھمک کار ءَ چہ درساں پیش بوتگ ءُ آئی وتی ادارہ سازی ءِ دیوان ( سرکل ) برجاہ داشتگ اَنت ءُ ھمک شپ یک سنگتے ءَ گپ جنگ ءِ زمہ واری داتگ۔

چوناھیا شھید جمال شاد کتاب آشکے اَت ءُ آئی سک کتاب ونتگ اَت ، بلے آئی گپ ھمیش اَت اگاں ما ھما روچاں وت ءَ چہ دیواناں ( سرکلاں ) دور داران کرت گڑا ما مجگی دْروشم ءَ نزور بْوان کن اِیں۔ پرچا کہ اے دیوان مارا ھمت بکش اَنت ءُ ما گیش دربراں کن اِیں ءُ مھکم بہ اِیں۔

ھمے دردناکیں سپر ءِ تہ ءَ سئے سنگت لگور بیت ءُ تچ اَنت ، دژمن ءِ دیم ءَ وتی سلاھاں چگل دے اَنت۔ شھید کمبر مھروان چہ درساں کستریں سنگت بیت آ کتاب وانان ءُ وتی دیواناں برجاہ دار اِیت ، وتی ھمراھیں بیل ءُ ھمبلانی سکین ءُ دلبڈی بیت۔

   روان اِنت۔۔۔