مردمی اگبالانی جاورانی سر ءَ پانک ءَ دسمبر 2023 ءِ گزارش شنگ کرتگ۔ چہ پاکستانی لشکر ءِ نیمگ ءَ دسمبر 2023 ءَ ھم مردمی اگبالانی لگتمانی برجاہ بیتگ چہ ایشی ءَ بلوچ راج ءِ بگیری ءَ برجاھیں زوراکیانی سر ءَ سک باز بے تاھیری ودی بیتگ۔ بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ چہ میان استمانی گلاں لوٹ کرتگ کہ آ اے بے تاھیرکنوکیں جاورانی دیم ءِ دارگ ءَ دزمانجنی بہ کن اَنت۔
دسمبر ءَ زور بیگواھی ، در آمیدگسی کوش ، مزدانک ءُ گر ءُ دار ءِ لوٹ کنوکیں پرایمنیں روانک ءِ بگیری ءَ یکشلیں بیڑ ءِ ویل پیش اتکگ اَنت۔
پانک ءَ مردمی اگبالانی بے تاھیر کنوکیں کچ ءُ شمار پیش کرتگ اَنت۔ آیانی رد ءَ پاکستانی لشکر ءَ چہ جتائیں دمگاں 54 کس زور بیگواہ کرتگ ، چہ بازیں وھدانی بیگواھی ءَ پد 32 کس یلہ بیتگ ءُ وتی لوگاں سر بیتگ اَنت۔
پانک ءِ رد ءَ دسمبر ءَ در آمیدگسی کوشانی دو ویل پیش اتکگ ، چہ ایشاں ایپ ڈبلیو او ءِ کارمندانی دست ءَ شریپ بگٹی ءِ کوش کہ لٹ دیگ ءُ کشگ بیتگ ءُ مھترھند ءِ چیردستی ءَ کارکنوکیں مردم کشیں رمبے ءِ دست ءَ ’ زاھر ء ابدل سمد ‘ ءِ کوش ھوار اَنت۔
پانک ءَ اے گپ ءِ سر ءَ زور داتگ کہ بلوچ چکچینی ءِ بگیری ءَ دراج پندیں روانک ءِ بنزہ تربت ءِ نزیک ءَ ’ بان ءِ کنڈک‘ ءَ بیتگیں ویل اَت، چہ ایشی ءَ بالاچ ء مولابکش ءِ دزگیریں کوش ءِ بگیری ءَ مزنیں کچے ءَ زھرشانی بنا بیتگ۔
پانک ءِ گزارش ءَ گوں دلجمی ءَ گْوشگ بیتگ کہ اے زھرشانیانی بگیری ءَ سرکار ءِ کرد ترند ءُ ناٹاھوک اَت ، آئی ءَ مردمی اگبال پانکانی بگیری ءَ بازیں ایپ آئی آر نبشتگ ءُ لھتے جاھاں آیانی راہ بستگ اَنت ءُ زھرشانی ءِ دارگ ءِ کوشست کرتگ۔ناں دلجمیں پٹ ءُ پول بیتگ ءُ ناں کہ بالاچ ءِ کوش ءَ ھواریں سروگانانی ماٹو کنگ ءِ آمیدگسی پرمان منگ بیتگ۔
اسلام آباد ءَ سر بیگ ءَ پد پانک ءِ گزارش ءَ ، روانک ءَ بھر زیروکیں مردمانی آ دگہ جیڑھانی سر ءَ ھم تْران کنگ بیتگ ، آ اود ءَ جنین ءُ چکانی پجیگ ءَ چہ 200 ءَ گیش مردم دزگیر کنگ بیتگ، آزار دیگ ءُ بد ءُ رد کنگ بیتگ اَنت۔ چہ ایشی ءَ پد ھم اے زْرمبشت ءَ راجی ءُ میان راجی تک ءَ بے کچیں مردمی پلہ مرزی رس اتگ۔
گزارش ءِ گڈی ءَ پانک ءَ زور داتگ ، ’’ میان استمانی دزمانجنی ءِ لوٹ ایوک ءَ پہ انیگیں باریگ ءَ نہ اِنت بلکیں بلوچ راج ءِ سر ءَ چہ دھکاں برجاھیں تْرام اتگیں زوراکی، پدمنتگی ءُ مردمی اگبالانی بگیریانی دور کنگ ءَ گْوستانک ءِ پرارزشتیں لوٹے۔‘‘
پانک ءَ پد ءَ درائینتگ ’’ بلوچستان ءَ دنیگت بے تاھیر کنوکیں جاور اِنت ، پرچا کہ پرایمنیں زھرشانی کنوکاں یکشل ءَ زوراکی ءُ آیانی بنکی اگبالانی نہ منگ ءِ دیمپانی اِنت۔ اے دزبندی زوراکیانی آسرینگ ءُ پہ بلوچ راج ءَ مزدانک ءِ الم کنائینگ ءَ پرارزشتیں لوٹے۔‘‘
پانکءَ چہ مردمی اگبالانی میان استمانی گلاں لوٹ کنان ، زور داتگ کہ آ میان استمانی دیدانک ءَ بہ جزین اَنت ءُ پاکستانی لشکر ءَ جست بہ کن اَنت۔
