گوادر: پاکستانی لشکر ءِ دست ءَ آوار جنگ بیتگیں زکریا ء الله بکش ءِ زوربیگواھی ءَ 29 روچ سرجم بیتگ۔ زکریا ءِ مات ءَ چہ سرکار ءَ وتی زھگ ءِ آجوئی ءِ لوٹ کرتگ ءُ گوشتگ کہ زکریا منی یکیں زھگ اِنت۔ من ھمے سرپد بوتگ آں کہ آ مزن بیت ءُ من ءَ کمک کنت بلے آئی اکس پمن پشت کپتگ۔ من همک روچ گوں آئی ءِ اکس ءِ چارگ ءَ مِراں ءُ زندگ باں. زندگی په ما کیامتے جوڑ بیتگ.
آئی ءَ گوشتگ کہ من پہ وتی زھگ ءَ ھمک در ٹک اِتگ، سرکاری کارگس ءُ جھگیرانی کر ءَ وتی پریات برتگ، بلے کس ءَ مئے گپ گوش نہ داشتگ اَنت۔ ما پہ وتی زھگ ءَ ھزار واھگ دل ءَ داشتگ۔
آئی ءَ گوشتگ که زکریا بلوچ بیست ءُ نو روچ پیش شپ ءَ چه وتی سنگتانی میان ءَ آوار جنگ ءُ بیگواه کنگ بیتگ، آئی ءِ زوربیگواھی ءِ سوب ءَ سرجمیں کھول جنجال اِنت۔
آئی ءَ گوشتگ کہ اگاں منی زھگ داں سے روچ ءَ یل کنگ نه بوت گڑا ما لاچار به اِیں که زھرشانی ءَ شھدگ ءَ بند به کن اِیں.
کھول ءَ گوں سرکار ءَ لوٹ کرتگ ءُ گوشتگ که منی زھگ زوت آجو کنگ ءُ مئے گون ءَ انساپ کنگ بہ بیت۔
