بلوچ نیشنل موومنٹ ءِ چئیرمین ڈاکٹر نسیم ءَ گْوشتگ کہ انیگیں روچاں وتگڑیں راجدوستیں گل نیشنل پارٹی ءِ چین ءِ روگ، دژمن ءُ دژمن ءِ ھمکاری ءُ کمک کنگ چین ءِ زورگری واھگانی سرجم کنگ ءُ آئی ءِ میارباریاں شریدار بیگ نشانی اِنت۔ بلوچ راجی آجوئی،بلوچ راجی زْرمبشت،راجی ھستی،راجی پجار ءُ راجی مڈیانی باروا مئے گپ مدام تچک اِنت۔ بلوچ نیشنل موومنٹ پاکستان ءِ گون ءَ ھرچ کجام ریاست یا زوراک ءِ ھرچ ھما گامگیج ءَ گوں تُرندی ءَ رد کنت کہ آ بلوچ سرڈگار،راجی مڈی ءُ راجی ھستی ءِ بگیری ءَ بہ بیت۔
آئی ءَ گْوشتگ کہ نیشنل پارٹی یک راج دژمن،زورگِر ءُ زورگرانی ھمکوپگ ءُ میارباریاں شریداریں گلے کہ بلوچ ءِ چکچینی،لُٹ ءُ پُل ءَ مدام دیم ءَ اِنت۔بلوچانی کوشارینگ ءِ کمک کنگ ءِ جاہ ءَ وتگڑیں وزیری گرگ ءُ بلوچ راجی زْرمبشت ءِ ھلاس کنگ ءَ پاکستان گون ءَ تچکی ءَ کار کنگ اِنت، اے دُرس نوں بلوچ ءَ یات اَنت کہ نوں ایشاں بلوچ ھچبر دل ءَ نہ بارت، بلے یک برے پد ءَ نیشنل پارٹی پاکستان ءُ چین ءِ وش کنگ ءَ بلوچ نمائندگ جوڑ بیتگ ءُ چین ءَ شُتگ ءُ وتگڑیں دیمروئی شوربندیانی کسھاں جنگ ءَ اِنت۔
ڈاکٹر نسیم ءَ گْوشتگ کہ چین یک زورگریں ریاستے کہ نہ ایوک ءَ بلوچ سرڈگار ءِ مڈیاں لُٹگ ءَ اِنت بلکیں گوں پاکستان ءَ ھور اِنت ءُ بلوچ ءِ چکچینی ءَ شریدار اِنت۔ گوں پاکستان ءَ آئی ءِ ھوارکاری اے گپ ءِ نشون اِنت کہ چین بلوچستان ءَ بس یک وتی اسٹریٹجک میراس سرپد بیت۔ چین پاکستان ءَ ماں بلوچستان ءَ لشکرکشیاں زر،جنگی ساز ءُ سامان ءُ نوکیں جنگی ٹیکنالوجی کمک کنگ ءَ اِنت، پمشکا پاکستان ءَ بلوچ چکچینی ءُ زوراکی تیز کُرتگ۔
آئی ءَ گْوشتگ کہ چین نہ ایوک ءَ بلوچ راجی مڈیاں لُٹگ ءُ وتی جند ءُ زمین ءِ نَپاں مھکم کنگ ءَ اِنت بلکیں سی پیک، گوادر پورٹ، بلوچ تیاب دپ ءَ چین ءِ زِرلشکر ءِ بنجل اے گپ ءِ منانک اَنت کہ چین ءَ بلوچستان یک جنگ ءِ میدانے جوڑ کُرتگ۔وتگڑیں میگا پروجیکٹ پہ بلوچ سرڈگار ءِ راجی مڈی،دود ءُ ربیدگ،راجی پجار ءَ ترسے جوڑ بیتگ اَنت۔اے راستیانی بنیاد ءَ بلوچ گل یا مردمے ءِ کہ گوں چین ءَ نزیکی کنگ لوٹ ایت ءُ یا گوں آئی ءَ شریدار بیت گڑا بزاں کہ راجدروھے۔
آئی ءَ گْوشتگ کہ بلوچ نیشنل موومنٹ چوشیں ھرچ مردم ءُ گل ءَ گوں تُردی ءَ رد کنت کہ آ گوں چین ءِ لَٹ ءُ پُلاں شریدار بیت۔اے کار نہ ایوک ءَ بلوچ راجی جُھد ءَ تاوان دیگ ءَ اِنت بلکیں دُژمن ءِ دستاں مھکم کنگ ءَ اِنت۔ چین ءِ ھواری ءَ دیمروئی ءِ ھوادگیں اوگام پہ بلوچ راج ءَ مدامی ئیں ایردستی ءِ سْوب جوڑ بیگ ءَ اَنت۔
بی این ایم چئیرمین ءَ گْوشتگ کہ انوں راجی زْرمبشت یک شریں دورے ءَ گْوزگ ءَ اِنت۔چاگرد ءَ باز چیز مَٹ بیتگ کہ چہ ایشی ءَ دژمن، دژمن ءِ ھمکاریں ادارہ ءُ دژمن ءِ داشتگیں چریک پریشان اَنت۔ پمشکا بلوچ راجی زْرمبشت ءِ تاوان دیگ ءَ وتگڑیں راجدوستیں گل دژمن ءُ دژمن ءِ میارباریاں شریداریں زوراکانی گون ءَ ھوار بیگ ءُ نوکیں کارشونی جوڑ کنگ ءَ اَنت ءُ بلوچ چکچینی ءِ تیز کنگ ءَ وتی کِرد ءَ پیلو کنگ ءَ اَنت، بلے بلوچ راج آیاں شری ءِ سر ءَ زانت ءُ ھما روچ پہ آیاں مھشر بیت وھدے راج آیاں اے بابت ءَ جُست کنت۔
آئی ءَ گْوشتگ کہ بلوچ بایدیں بہ زانت کہ چین ءُ پاکستان ءِ ھوارکاری ایوک ءَ مالی ءُ سیاسی نہ اَنت بلکیں بلوچ راجی زْرمبشت ءِ ھلاس کنگ ءِ یک مُھمکیں پندلے۔پمشکا مارا یکجاہ بیگ، جُھد کنگ ءُ دیمونی دیگ ءُ آیانی پندل بےسوب کنگی اَنت۔ بلوچ نیشنل موومنٹ کول کنت کہ ما ھرچ پیم ءَ وتی سرڈگار،مڈی ءُ راجی پجار ءَ پھریزیں ءُ ھرچ ھما زوراک ءِ بگیری ءَ وتی جھد ءَ برجاہ دار ایں کہ آ بلوچ راج ءِ بگیری ءَ بہ بیت۔
