بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ سئیں اُرشانی زمہ واری منّ اِتگ ءُ گْوشتگ کہ بی ایل اے ءِ سرمچاراں نوشکے ءَ سے جتائیں جاھاں شھدگ بستگ ءُ پٹ ءُ پول کرتگ، لیویز ءِ سلاہ ءُ بند ساچی شرکت ءِ کارمند دزگیر کرتگ اَنت، کلات ءُ گوادر ءَ دو جتائیں اُرشاں سرمچاراں یک چاریگے کشتگ ءُ یکے ٹپی کرتگ۔
آئی ءَ گوشتگ کہ بی ایل اے ءِ سرمچاراں دوشی زرین جنگل ءَ شھدگ ءَ برجاھیں لیویز ءِ یک پانگسے گپتگ ءُ ساڑی ئیں کارمند دزگیر کرتگ اَنت۔ سرمچاراں لیویز کارمندانی سلاہ ءُ آدگہ سامان بُرتگ اَنت، لیویز کارمند بلوچ بوتگ اَنت پمشکا آیانی جند تاوان نہ داتگ اَنت۔
جارکش ءَ گوشتگ کہ ھمے میان ءَ سرمچارانی یک ٹولی یے ءَ داں یک ادارے ءَ شھدگ بستگ ءُ گاڑی گاڑی پٹ ءُ پول کرتگ اَنت۔ سرمچارانی سیمی ٹولی ءَ یک بند ساچی شرکتے ءِ سر ءَ اُرش کُرتگ ءُ پنچ کارمند دزگیر کرتگ اَنت ءُ شرکت ءِ مشین ءُ سامان مانداشتگ اَنت۔دزگیر کرتگیں کارمند جست ءُ پرس کنگ بیگ اَنت۔
آئی ءَ گوشتگ کہ ھمے وڑ ءَ بی ایل اے ءِ سرمچاراں دوشی کلات ءِ ھند منگچر ءَ زورگریں پاکستانی لشکر ءِ یک چاریگے کشتگ۔ ایشی ءَ وت ءَ گنوک ءِ وڑ ءَ کُتگ ءُ منگچر ءَ پہ زورگریں لشکر ءَ چاریگی یے کُرتگ۔
جارکش ءَ گوشتگ کہ بی ایل اے ءِ انٹیلی جنس ونگ ” زراب“ ءَ ھمے مردم ءِ بابت ءَ جُست ءُ پُرس کُرتگ، زراب ءِ ھالانی رِد ءَ چاریگ ءَ منگچر ءَ پہ پاکستانی لشکر ءَ چاریگی ءِ ٹولی یے جوڑ کرتگ۔ اے ٹولی ءَ ھوار آدگہ درسیں مردم بی ایل اے ءِ نشانگ ءَ اَنت۔
آئی ءَ گوشتگ کہ دوشی بی ایل اے ءِ سرمچاراں گودر شھر ءَ ڈھور پانگس ءِ نزیک ءَ زورگریں پاکستانی لشکر ءِ چاریگانی یک ڈوارے ءِ سر ءَ اُرش کُرتگ۔ چہ ایشی ءَ یک چاریگے ٹپی بوتگ۔ ھمے چاریگ ھجام ءِ دکان ءَ زورگریں پاکستانی لشکر ءِ گْوشگ ءَ چاریگی کنگ ءَ بوتگ۔
