بلوچ راجی زرمبشت ( بی این ایم ) ءِ بنجاھی سرکماش ڈاکٹر نسیم ءَ پاکستانی لشکر ءِ دست ءَ زور بیگواہ کنگ بوتگیں کماشیں بلوچ سروک استاد واھد کمبر ءِ درگت ءَ ماں چاگردی رسانکدر ءِ تند جاہ ایکس ءَ نبشتگ کہ پاکستان ءَ میان استمانی کانودانی بنیاد ءَ واھد کمبر جنگی بندیگے لیکگی اِنت۔
آئی ءَ گوشتگ کہ استاد واھد کمبر یک زانوگریں بلوچ راجکار ءُ گھگیری ءِ مھکمیں منوکے، چنچو دھکاں پہ بلوچستان ءِ آجوئی ءَ جھد کنگ ءَ اِنت۔ 1970 دھک ءَ وتی ورنائی ءَ آ پاکستان ءِ زورگری ءِ بگیری ءَ سلاہ بندیں جھد ءَ ھوار بوتگ۔آئی ءِ ھمے واھگ داں مرچی ھم برجاہ اِنت۔
ڈاکٹر نسیم ءَ گوشتگ کہ بژن ءِ گپ ھمیش اِنت کہ جولائی ءَ پاکستان ءِ چیریں ادارھانی جوڑ کرتگیں کارمند ءُ منشیات ءِ باپاری کنوکانی ھواری ءَ چہ ایران ءِ شھر کرمان ءَ آوارجتگ۔ چہ آوار جنگ ءَ پد واھد کمبر بیگواہ اِنت۔ کانودی سروک ءُ کھول سرپد نہ اَنت۔
آئی ءَ گوشتگ کہ آئی جنک مھلب واھد ءِ گوشگ اِنت کہ آ پہ ھمے گپ ءَ زور دیگ بیگ ءَ اِنت بہ گْوش ایت منی سیاسی جُھد میارباری یے ءُ پہ وتی مردمانی آجوئی ءَ من چہ وتی سرجمیں زندگی ءِ جُھد ءَ بژنیگاں۔
ڈاکٹر نسیم ءَ گوشتگ کہ اے زوراکی پہ آئی ءُ مردمی ھکانی تچکی ءَ بگیری اِنت۔ پاکستان پہ سیاسی بگیریانی بے توار کنگ ءَ وتی زوراکی ءِ شوندات برجاہ داشتگ، تیوک ءَ بلوچ رھشون، کارکن ءُ زانوگراں نشانگ کنگ ءَ اِنت۔
بی این ایم ءِ سرکماش ءَ گوشتگ کہ آئی ءِ زوت آجو کنگ ءُ پہ بلوچستان ءِ آجوئی ءِ گپ جنوکیں سیاسی سروک ءُ کارکنانی چہ پاکستان ءِ زور بیگواہ کنگ ءِ ھلاس کنگ ءِ لوٹ ءَ کناں ءُ اے باروا میان استمانی ءَ دزمانجنی کنگ لوٹ ایت۔ پاکستان ءَ میان استمانی کانودانی بنیاد ءَ واھد کمبر جنگی بندیگے لیکگ ءُ گوں آئی ءَ ھمائی وڑ ءَ کنگ لوٹ ایت۔
