بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ زور بیگواھیں دلجان ءِ کماش ءِ تامربند شنگ کرتگ ءُ آئی ءِ سر ءَ بندات ءَ کماش ءِ گپ نبشتگ اَنت کہ منی زھگ دلجان ءِ آجوئی ءَ ابید ما وتی نندانک ءَ ھلاس نہ کن ایں اگاں پہ ایشی ما جنگ ھم بہ بہ ایں، چہ زوریں بیگواھی ءِ ترس ءَ منی زھگ آواران ءَ نہ نشتگ، کجام میار ءِ بیاد ءَ آ بیگواہ کنگ بوتگ۔
ڈاکٹر ماہ رنگ ءَ گوشتگ کہ پہ دلجان ءِ آجوئی ءَ آواران ءَ گوستگیں شش روچ اِنت زھرشانی نندانک برجاہ اِنت۔ دلجان ءِ کھول ءُ نندانک ءَ ھواریں مردم یکشل ءَ چہ پاکستانی لشکر ءِ نیمگ ءَ ترسینگ بوگ ءَ اَنت۔ آئی کماشیں پت اللہ بکش اے امر ءَ نندانک ءَ نشتگ۔
آئی ءَ گوشتگ کہ دلجان آواران ءِ جاہ منند اِنت، آواران چہ بلوچستان ءِ لشکری ھنداں زانگ بیت۔ اود ءَ چہ لشکرکشیانی سوب ءَ گیشتریں مردم پہ لڈ ءُ بار کنگ ءَ لاچار بوتگ اَنت ءُ آدگہ آبادی ریاستی زوراکیانی آماچ اَنت۔ ھندی مردماں پہ زور کار گیت، کانود نیست، چہ ایشی بلوچستان ءِ ھمک کھول سانمند اِنت۔
