گوادر : بلوچ راجی زْرمبشت ( بی این ایم ) ءِ شھید انور ایڈوکیٹ کیچ۔گوادر ھنکین ءِ نیمگ ءَ بی این ایم ءِ کلانھیں باسک یوسپ ءِ پاگواجھی ءَ بلوچ شھیرانی روچ ءِ رد ءَ نیادے برجم دارگ بیتگ۔
اے نیاد ءِ جارچین ھکین ءِ کمک سرکماش بھار اَت ، بی این ایم ءِ کمک سرکماش ڈاکٹر جلال ، ھنکین ءِ کماش بابا جی آر ءُ کمک کارگشاد زینل ءَ تْران کرت۔
آیاں درائینتگ ، زیک ھم پہ بلوچ ءَ ڈیھ ءُ سرڈگار چہ آئی ءِ ساہ ءُ سراں دیم ءَ بیتگ ، مروچی ھم راج ، راجی آجوئی ءُ ھرچ ھما چیز کہ گوں راجی پجار ءَ بندوک اِنت چہ ھرکسی جند ءُ ساہ ءُ سراں دیم ءَ اِنت۔پہ بلوچستان ءِ آجوئی ءَ نْدر بیتگیں سراں تاوانے کارے نہ کرتگ اگاں بلوچ پہ وتی سرڈگار ءِ پھریزگ ءَ چہ مرگ ءَ بہ ترس ایت ءُ دست ءَ کنٹ ءَ بہ کنت ءُ بہ نند ایت مدامی چہ پجار ءَ زبھر بیت۔ اے تیوک ءَ زمین ءِ جنگ نہ اِنت بلکیں ماں اے گیدی ءِ دلبند ءَ بلوچ ءِ مانشت ءُ پجار ءِ پھریزگ ءِ ھم میڑ اِنت۔
آیاں گْوشتگ ، ھچ مردم بے سیتانی دیناں وتی پرسیتیں زندمانی ءَ ببا نہ دنت ءُ اگاں کسے چوش بہ کنت ھم اے ھوش ءُ ساریں کارے نہ بیت بلے آجوئی ءِ ھما چیز اِنت کہ ابید ایشی ءَ زندمان چہ وتی ھرچ وڑیں رنگ ءُ بو ءَ زبھر بیت۔ ابید چہ آجوئی ءَ راجے وشھالیں زند ءُ وشیں باندات ءِ ھدابند بیت نہ کنت۔ اگاں ھیرت بہ سیل گڑا ھمے زانگ دنت کہ اے جنگ پہ چہ بدیں زندمانی ءَ درکپگ ءُ وشیں زندمانی ءِ جنگ اِنت۔ گوں ایشی ءَ چہ زیردستی ءِ تھارگاں درکپگ ءُ آجوئی ءِ درپشانکیں چاگردے ءَ ساہ زیرگ ءِ واھگ بندوک اِنت۔ زیردستی ھما سست کشیں زھر اِنت کہ راجے ایشی ءَ بہ من ایت گڑا میزان میزان ءَ مر ایت ءُ گمسار بیت۔
آیاں وتی گپانی تہ ءَ گْوشتگ شھمیرانی واکداری چہ ھما روچ ءَ بندات بیت کہ آ شھمیر بہ اَنت پرچا کہ شھمیر بھ نہ مر اَنت بلکیں داں جمار ءَ نمیران اَنت۔مروچی ما کہ شھمیراں یات کن ایں ، ایشی ءِ بزانت اش اِنت کہ مار اھم چوش شھمیراں چہ وتی کشک ءَ پدکنزگی نہ اِنت۔
آیاں گْوشتگ ، بلوچ مات ءُ گھاراں ھم باید اِنت کہ آ بلوچ ءِ جھد ءَ وتی سرپد بہ بہ اَنت ءُ ھمراھداری بہ کن اَنت۔
