جھد ءِ پڑ ءَ شھمیر بیتگیں شھزانت، سوگہ مزن کردیں کارست اگاں دژمن ءَ مہ کشتین اَنت ھم آیانی کرد ءِ مزنی کم نہ بیتگ اَت۔ شھمیری نیمگے پہ راج ءَ پھر ءُ شانی گپے ءُ دومی نیمگ ءَ تاوان اِنت ھم۔ شھمیر چہ ھمے سْرپ ءِ مردمان اَنت کہ مروچی پہ بلوچ ءِ آجوئی ءَ جھد ءَ اَنت۔ مارا ایشانی دیمونیانی ارزشت ھم زانگی اِنت ، دوست دارگی اَنت ، کمک کنگی اَنت۔
اے گپ بلوچ راجی شھمیرانی روچ ءِ درگت ءَ بی این ایم مشکے آواران ھنکین ءِ مراگشےءَ تْران کنان بی این ایم ءِ رسانک ءُ ربیدگی کارگشاد کازی داد مھمد ریھان ، بنجاھی پتر ءِ باسک چیپ اسلم ، ھنکین ءِ کماش استاد مھران ، زْرمبش براھوئی ءِ شونکار پرھان ءَ تْران کنان ءَ گْوشتگ اَنت۔مراگش ءِ جارچین ھنکین ءِ کمک سرکماش تلار ناز اَت۔
کازی ریھان ءَ درائینتگ بلوچ شھمیر پہ وتی نام ءَ شھمیر نہ بیتگ اَنت بلکیں آیاں پہ بلوچ ءِ سیتانی پھریزگ ءَ وتی سر داتگ اَنت۔آیانی کوشست بیتگ کہ بلوچ توانمند ءُ پزور بہ بیت ءُ آئی ءِ دژمن نزور ۔ دژمن ھما وھد ءَ نزور بہ اَنت کہ ما کمتر تاوان بہ گند این ءُ دشمن گیشتر پمیشکا جھدکار کوشست کنت کہ وتی تاوان کم بہ کنت ءُ دژمن ئیگ ءَ گیش۔جنگ وھدے المی بیت گڑا جنگ ءَ پشت کنگ یا سر ءَ جھل کنگ مستریں تاوان اِنت بلے جنگ ءِ تہ ءَ باج برگ ءَ ھم المی اِنت۔ما وتی سراں ھم بہ پھریز این ءُ زندگ بہ مان ایں۔ وشیں زندمان ، آجوئی ءُ وتی لیکھانی سوبمندی ءِ جنگ ءَ اگاں سرے روت ھما سر شھمیر اِنت۔
چیپ اسلم ءَ گْوشتگ مئے تہ ءَ کسے شھمیر بیت ما آئی ءَ ستا دے این ءُ آئی ءِ نام ءَ پہ شری گر ایں بلے ھمے مردم مئے ھمراہ ءُ ھمبل اَنت کہ پہ بلوچ ءُ بلوچستان ءَ وتی سراں نْدر کنگ ءَ اَنت۔ پہ راجانی زندگی ءَ آجوئی ھژدری اِنت ءُ پہ آجوئی ءَ سر نہ پھریزی بلوچ ءِ دود اِنت۔وھدے زورگریں انگریزانی دیم ءَ بلوچانی بادشاہ ھان مھراب ھان پہ میڑ ءَ در کپت آئی ءَ زانت کہ جنگ ءَ مرگ گون اِنت بلے وتی آجوئی ءِ ببا دیگ ءَ ساڑی نہ بوت ءُ وتی سر ئِے نْدر کرت۔
استاد مھران ءُ پرھان ءَ 13 نومبر ءِ گْوستانکی پژدر ءَ گپ جتگ ، آیاں گْوشتگ انگریزاں بلوچ راج ءَ بے کچیں تاوان داتگ۔ بلوچانی بادشاہ مھراب ھان ءَ نہ لوٹ اتگ کہ انگریز چہ بلوچ سرڈگار ءَ بہ روت ءُ اوگانستان ءِ سر ءَ ارش بہ کنت۔ پمیشکا آیاں ھرجاہ انگریز لشکر ءِ سر ءَ بیڑ برتگ۔ انگریزاں زانتگ داں مھراب ھان ھست آ وتی مول ءَ سوبمند بیت نہ کن اَنت۔ پمیشکا آیاں آزاد بلوچستان ءِ بنجاھی شھر کلات ءِ سر ءَ ارش کرت ءُ بلوچ ءِ بادشاہ مھراب ھان گوں سدانی ھمراھاں شھمیر کرت۔ ھما روچ ءَ بہ گر داں مروچی بلوچ پہ وتی آجوئی ءَ وتی ھوناں ریچان اِنت۔
