شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5626 روچ سرجم بوتگ۔ دوشمبے ءِ روچ ءَ سیاسی ءُ چاگردی کارکن اجاز اھمد، الی اھمد، سلام، اھباز اھمد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ زوریں بیگواھی، ژانگولیں لاشانی دزگپگ، سیاسی کارکنانی نشانگ کنگ ءُ لّس آبادیانی سر ءَ زورگریں ریاستی مدامی کار اَنت۔ بلے وھدیکہ راجی زرمبشت چہ جتائیں چیزاں گوستگ ءُ گوں ترندی ءَ دیم ءَ جنزگ ءَ اِنت گڑا زورگریں ریاست ترس آماچ بوتگ ءُ زوراکی ءِ درسیں سیمسراں گواز کنگ ءَ اِنت۔
ماما کدیر گوشتگ کہ چہ 2000 ءَ بگر داں 2024 ءِ ھمے نومبر ءَ ھشتاد ھزار بلوچ پسگ زور بیگواہ کنگ بوتگ اَنت۔ اگاں کسے اے کساس ءَ نہ منّ ایت گڑا منی گون ءَ رھوت بہ کنت من ھمک روچ ءِ بنیاد ءَ سدانی کچ ءَ بلوچ نودربر، سیاسی کارکن ءُ ھمج بھرگ ءِ مردم زور بیگواہ کنگ بوگ ءَ اَنت۔
