کیچ: مند ءِ میتگ مھیر ءَ زورگریں پاکستانی لشکر ءِ نیمگ ءَ مردمانی گس ءُ ڈگارانی دستیگ کنگ ءِ بگیری ءَ مرچی سے روچ اِنت کہ زھرشانی برجاہ اِنت۔ زھرشانی ءَ جنین ءُ زھگاں بازیں کچے ءَ بھر زرتگ۔
زھرشانی کنوکیں مردمانی گوشگ انت کہ پاکستانی لشکر ءَ پنچ سال ءَ گیش انت کہ مئے گس دستیگ کرتگ ءُ نشتگ ـ بندات ءَ مارا وھد دیگ بوتگ کہ سبر بہ کن اِت مرچی باندا لشکر پاد کیت ءُ روت، بلے نوں پنچ سال ءَ گیش گوستگ انگت ءَ پاد آھگ ءِ نام ءَ نہ زانت۔ ماچد ءُ گیش اوپار کرت نہ کن ایں۔
آیاں گوشتگ کہ پاکستانی لشکر مئے گسانی یل کنگ ءَ ابید گسانی دیم ءِ ڈگاراں ھم دستیگ کنگ ءُ اچما پلگ ءِ جھد ءَ کنگ ءَ اِنت۔
آیاں گوں بلوچ راج، سیاسی، چاگردی ءُ مردمی ھکانی گل ءُ باسکانی گون ءَ لوٹ کرتگ کہ پاکستانی لشکر ءِ زوراکیانی بگیری ءَ توار چست کنگ ءَ مئے ھمراھداری ءَ بہ کن اَنت۔
انچوش گوشگ بوگ ءَ اِنت کہ مرچی زبیدہ جلال ءِ گھار رھیمہ جلال ھم زھرشانی جاہ ءَ آتکگ ءُ گوں مردماں لوٹ کرتگ کہ دگ ءَ پچ بہ کن اِت۔ آیانی گوشگ اِنت دانکہ پاکستانی لشکر چہ مئے گساں کشگ نہ بوتگ ما وتی زھرشانی ءَ برجاہ دار ایں۔
