شال: بلوچ یکجھتی کمیٹی ءِ نیمگ ءَ زوریں بیگواھیانی بگیری ءَ زھرشانیانی درچ ءَ شمبے ءِ روچ ءَ زھرشانی کنگ بوتگ۔ زھرشانی ءَ بی وائی سی ءِ سروک ڈاکٹر ماہ رنگ آدگہ سیاسی ءُ چاگردی کارکناں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی روانک چہ سریاب دگ ءَ زانشتجاہ چاراہ ءَ درکپتگ ءُ جتائیں جاھاں ترّ ءُ گرد کنگ ءَ پد ابدالستار ایدھی چاراہ ءَ مچ بوتگ اَنت۔
زھرشانی ءَ بلوچ یکجھتی کمیٹی ءِ سروک ڈاکٹر ماہ رنگ ءُ آدگہ مردماں تران کرتگ ءُ گوشتگ کہ مئے زھرشانی ءِ مول زوریں بیگواھی ءِ ھلاسی ءُ زور بیگواہ کنوکیں ناشرکارانی چہ بلوچستان ءَ کشگ اِنت
آیاں گوشتگ کہ مئے ایمنیں زھرشانی ءُ پہ زور بیگواھیں مردمانی کھولانی دارگ ءَ چنچو زوراکی کنگ بہ بیت ما ھمنچو مھکم بہ ایں ءُ درکپ ایں۔ گوستانک اے چیز ءِ گواہ اِنت کہ وھدے ادارھاں بلوچانی چنچو گوں زور ءَ دارگ ءِ جھد کرتگ ما ھمنچو گوں مھکمی ءَ در کپتگ ایں۔ بلوچستان ءَ زوریں بیگواھیانی بگیری ءُ پہ بیگواھیں مردمانی آجوئی ءَ اے زھرشانی پہ ھما توانمنداں تچکیں کلوھے۔
آیاں گوشتگ کہ مرچی اے ایمنیں مچی ءِ پارست ءَ ما ھمے لوٹ ءَ کن ایں کہ چہ مئے سرڈگار ءِ سر ءَ زور بیگواہ کنوکیں مردم کشگ بہ بنت۔ زھرشانی زور بیگواھیں مردمانی کھولاں ھمے سدکی ءَ دنت کہ آ وتی بیگواھیں مردمانی لڑ ءَ بلوچ یکجھتی کمیٹی ءَ سر بہ کن اَنت دانکہ زور بیگواھیں مردم یل کنگ بہ بنت۔
