ھاران: دو روچ پیش زورگریں پاکستانی لشکر ءِ دست ءَ زور بیگواہ کنگ بوتگیں ابید اللہ تگاپی ءِ زوریں بیگواھی ءِ بگیری ءَ زھرشانی روانکے کشگ بوتگ ءُ پد ءَ ریڈ زون ءَ زھرشانی ءَ نشتگ اَنت۔
روانک ءَ سیاسی ءُ چاگردی باسکانی ھواری ءَ زور بیگواھیں مردمانی کھول ءُ جنین ءُ زھگاں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس گوں بوتگ اَنت کہ آیاں زوریں بیگواھی ءِ بگیری ءَ اوگام جتگ ءُ پہ زور بیگواھیں مردمانی آجوئی ءَ لوٹ کرتگ۔
آیاں گوشتگ کہ ابید اللہ تگاپی سی ٹی ڈی ءُ چیریں ادارھانی کارمنداں 20 اکتوبر ءَ چہ میزان بینک ءِ دیم ءَ آوار جتگ ءُ بیگواہ کرتگ انگت بیگواہ اِنت۔ دانکہ ابید اللہ آجو نہ بوتگ ما وتی زھرشانی نندانک ءَ برجاہ دار ایں۔
آیاں گوں ھاران ءِ درسیں بھرگاں سیادی داروکیں مردماں لوٹ کرتگ ءُ گوشتگ کہ آ بیا اَنت ءُ مئے زھرشانی نندانک ءَ بھر بزور اَنت ءُ پہ ابید اللہ تگاپی ءِ آجوئی ءَ وتی کرد ءَ پیلو بہ کن اَنت۔
