تربت: چہ بلوچ میوزک پروموٹرز سوسائٹی ءِ نیمگ ءَ پہ بلوچی زبان ءِ مزن نامیں زھیروک گُش ءُ وش الھانیں گُشندہ شاکر زامُرانی ءِ یات ءَ 19 اکتوبر 2024 ءِ بیگاہ ءَ ماں بلوچستان اکیڈمی کیچ ءَ یک مراگشے برجم دارگ بوتگ۔ اے مراگش بیگاہ ءِ ادار چار ءَ بِندات بوتگ ءُ شَپ ءِ ادار نو ءَ آسر بوتگ۔
اے مراگش دو بھرانی تہ ءَ بوتگ۔ دیوان ءِ بِندات ادارہ ءِ کُمک کارمستر ھلیل تگرانی ءَ گوں وتی وش آتکی تران ءَ کُرتگ۔ ھلیل ءَ دیوان ءَ بھر زورتگیں مردم وشّ آتک کرتگ اَنت ءُ ادارہ ءِ گوستگیں کارکردگی دیوان ءِ دیم ءَ پیش کرتگ اَنت۔
اولی بھر ءَ بلوچی زگریں زیمر ءُ زھیروک، زیک ءُ مرچی” ءِ بُنگپ ءَ یک پینل ڈسکیشنے کنگ بوتگ۔ پینل ڈسکیشن ءِ تہ ءَ ڈاکٹر گپورشاد، انجنیئر داؤد کلمتی، پروپیسر سادک سبا ءُ نسیب مزار ءَ بُنگّپ ءِ سر ءَ شریں وڑے ءَ گپّ کرتگ۔ اے بھر ءِ جارچین بجار بوتگ۔
چہ پینل ڈسکیشن ءَ پد بلوچی میوزک پروموٹرز سوسائٹی ءِ پاگواجہ اسھاک رھیم ءَ گوں دیوان ءَ بِنداتی تران کرتگ ءُ ادارہ ءِ آؤکیں مراگشانی باروا مردماں سرپدی داتگ۔اسھاک رھیم ءَ چہ بلوچی میوزک پروموٹرز سوسائٹی ءِ نیمگ ءَ پہ شاکر زامُرانی ءَ چار لکّ کلدار ءِ جار پِرّینتگ ءُ چہ ادارہ ءِ نیمگ ءَ اے ھم جار جتگ کہ مئے ادارہ ھرسال یک دادے سال ءِ گِھتریں ءُ گچینی سَوت ءَ دنت۔
چہ اسھاک رھیم ءِ تران ءَ پد بلوچی میوزک پروموٹرز سوسائٹی ءِ ٹولی ءَ اسٹیج ءِ سر ءَ شاکر زامُرانی ءَ چار لکّ کلدار ءِ چیک دست ءَ داتگ ءُ آئی ءَ شیلڈ ئے ھم داتگ۔
چہ ایشی ءَ پد دیوان ءِ زیمری بھر بندات بوتگ اے بھر ءَ ورنائیں ءُ کماشیں گُشندہ ءُ زھیروک گُشاں وتی ازم ءِ درانگازی کرتگ۔
زیمری بھر ءَ دیوان ءِ دیم ءَ کادر بلوچ، آبد الاھی، ازگر سنا، زمان شاکر زامُرانی، ولی مھمد دشتی، ھسین پیرُک ڈنڈاری، بیبگر اھمد، سادک سبا، آسمی بلوچ ءُ شاکر زامُرانی ءُ سوت ءُ زھیروک گوشتگ اَنت ءُ چہ دیوان ءَ داد گپتگ۔
دیوان ءِ جارچینی ءِ ڈُبّہ بلوچی میوزک پروموٹرز سوسائٹی ءِ کارگُشاد اسھاک ھاموش ءَ گون بوتگ۔ دیوان ءِ تہ ءَ زیمر دوست، لبزانکی، سیاسی ءُ چاگردی گچینی مردماں ابید مھلوک ءَ مزنیں کساسے ءَ بھر زُرتگ۔
