گزه: بیت لاھیہ ءَ اسرائیلی لشکر ءَ بمباری کرتگ ءُ ھشتاد مردم بیران بوتگ اَنت۔
ھماس ءِ رسانکدر ءِ گوشگ اِنت کہ گوستگیں شپ ءَ اسرائیلی لشکر ءَ گزہ ءِ گوریچانی ھند بیت لاھیہ ءَ بمباری کرتگ ءُ ھشتاد مردم ءَ گیش بیران ءُ باز مردم ٹپی بوتگ اَنت۔
گزہ ءَ اسرائیلی لشکر ءِ اُرشانی بندات بوگ ءَ 42 ھزار مردم ءَ گیش بیران ءُ 99 ھزار مردم ٹپی بوتگ اَنت۔ ھمے وڑ ءَ گزہ ءِ جتائیں ھنداں ھزارانی کچ ءَ گس، نادراھجاہ ءُ وانگجاہ تباہ بوتگ ءُ باز مردم بے گس بوتگ اَنت۔
دومی نیمگ ءَ اسرائیلی لشکر ءِ جارکش ءَ گوشتگ کہ دوشی لبنان ءِ بنجاھی شھر بیروت ءَ ھزب اللہ ءِ انٹلی جنس کارگسے ءَ ھوار زمین ءِ چیر ءَ آیانی سِلاہ جوڑ کنگ ءِ کارجاھے نشانگ کرتگ ءُ ھزب اللہ ءِ سے کماندار کشتگ۔
جارکش ءَ گوشتگ کشگ بوتگیں کماندارانی نام اباس سلامہ، رجا اباس ءُ اھمد الی ھسین اِنت۔ آئی ءَ گوشتگ گوستگیں بیست ءُ چار ادارانی تہ ءَ ھزب اللہ ءِ 65 کارمند کشتگ۔
دومی نیمگ ءَ ھزب اللہ ءَ اسرائیلی لشکر ءِ درشان ءِ پسّہ ءَ گوشتگ اسرائیل ءِ جنگی بالگرداں بیروت ءَ یک گسے ءَ ھوار مسیت ءُ نادراھجاھے بمباری کرتگ۔
