بلوچ یکجھتی کمیٹی ءِ سروک ڈاکٹر ماہ رنگ ءَ وتی شنگ کرتگیں درشانے ءَ گوشتگ کہ یک نیمگے ءَ پاکستان یک میان استمانی کانپرسے ءِ سروکی ءَ کنگ ءَ اِنت ءُ ھمے میان ءَ بلوچستان ءَ مردمی ھکانی ناھکیں بگیری ءَ ھم کنگ ءَ اِنت۔
آئی ءَ گوشتگ کہ انوگیں روچاں کراچی ءُ لاھور ءِ وڑیں شھراں ھوار بلوچستان ءِ جتا جتائیں ھنداں درزنانی کچ ءَ بلوچ نودربر ءُ ورنا زوریں بیگواھی ءِ نشانگ کنگ بوتگ اَنت ءُ نودربر بے میار اَنت،پمیشکا کہ ریاستی پھازداریں لشکر آیاں بے وارنٹ، ایپ آئی آر ءُ منانک ءَ کجام ھم وھد ءُ کجام جاہ ءَ آوار جنت۔
ڈاکٹر ماہ رنگ ءَ گوشتگ کہ گوستگیں شپ ءَ 16 اکتوبر ءِ بیگاہ ءَ کراچی ءِ ھند گلشن اکبال ءِ بشیر ولیج ءَ یک ماڑی یے ءَ نشتگیں باز بلوچ نودربر پاکستانی لشکر ءُ چیریں ادارھاں دزگیر کنگ ءَ پد زور بیگواہ کرتگ اَنت۔ ھمے میان ءَ چہ بلوچستان ءِ جتائیں ھنداں دگہ بلوچ نودربر زور بیگواہ کنگ بوتگ اَنت۔
بلوچ یکجھتی کمیٹی ءِ سروک ءَ گوں میان استمانی تک ءُ مردمی ھکانی گلانی گون ءَ پہ اے ویلانی باروا زورتیں دلگوش ءِ لوٹ کرتگ۔
ڈاکٹر ماہ رنگ ءَ دیمتر ءَ گوشتگ کہ بلوچ نودربر ناھکیں وڑے ءَ ریاستی آزادھی ءُ زوریں بیگواھیانی نشانگ بوگ ورنائیں پدریچ ءِ بے توار کنگ ءُ ترسینگ ءِ جھد اِنت۔ اے زوریں بیگواھی نہ تیوک ءَ بیادی مردمی ھک ءُ سرکانود ءِ بگیری اِنت، بلکیں بیگواہ بوتگیں مردمانی کھولاں ریاست بے اوست ءُ بے چاڑی ءِ نیمگ ءَ تیلانک دیگ ءَ اِنت۔
آئی ءَ گڈی ءَ گوشتگ کہ جھان بلوچستان ءَ برجاھیں اے ناھکیانی مان نیارگ ءَ گرانیں بارے مہ لیک ایت، زور بیگواھیں نودربرانی زوتیں آجوئی ھژدری اِنت ءُ زوریں بیگواھی ءِ زمہ وار ریاستی لشکر ءُ چیریں ادارھاں سرجم ءَ جست بہ کنت۔ بلوچستان ءَ پہ ترس ءُ آزاردھی ءِ ھلاس کنگ ءَ انساپ ءُ جست ءُ پرس کنگ لوٹ ایت۔
