شال: بیگواھیں بلوچانی توار ( وی بی ایم پی ) ءَ ماں رسانکدر ءَ وتی شنگ کرتگیں درشانے ءَ گوشتگ کہ الی اھمد شاھوانی ءِ پت نور اھمد مرچی وی بی ایم پی ءِ گدان ءَ آتکگ ءُ وتی زھگ ءِ زوریں بیگواھی ءِ کیس گل ءِ کمک سرکماش ماما کدیر ءِ کِر ءَ یاداشت کرتگ ءُ گوشتگ کہ منی زھگ الی اھمد شاھوانی پولیس کارمندے آ گوں آئی جی پولیس بلوچستان ءَ کار ءَ بوتگ، 26 جولائی 2021 ءَ چہ کار ءَ دیم پہ گس ءَ پیداک بوتگ گوں ھمبلے ءَ بی بی زیارت ءِ نزیک ءَ ھوٹلے ءَ چاہ ءِ ورگ ءَ شتگ چہ ھمود ءَ پاکستانی لشکر ءَ درکانودی آوار جنگ ءَ پد بیگواہ کرتگ۔ آئی ءَ گوشتگ کہ الی اھمد ءِ بارو ءَ آئی کھول ءَ ھچ وڑیں سرپدی دیگ نہ بوتگ ھمے سوب ءَ کھول سکا جنجالانی دیمپان اِنت۔ وی بی ایم پی ءِ رد ءَ ماما کدیر آئی کھول دلجمی داتگ کہ الی اھمد ءِ کیس ءَ گل ءِ نیمگ ءَ پہ زور بیگواھیں مردماں جوڑ بوتگیں کمیشن ءُ سرکار ءَ دیگ ءِ ھواری ءَ پہ آئی آجوئی ءَ ھمک جاہ ءَ توار چست کن ایں۔
