کراچی: بلوچ یکجھتی کمیٹی ءِ سروک ڈاکٹر ماہ رنگ ءَ کراچی پریس کلب ءَ پریس کانپریس کرتگ ءُ گوشتگ کہ دوشی کراچی بالی پٹ ءُ چہ آئی ڈن ریاستی ادارہ، ایپ آئی اے ءُ سند پولیس ءَ شھری ءِ بستار ءَ منی درسیں بنیادی ھک لپاشتگ اَنت ءُ مئے گون ءَ انچوش پیش بوتگ اَنت کہ گپ کنگ نہ بیت۔ یک میان استمانی نامداریں مگزین ” ٹائم “ ءَ من ءَ ھمے سال ءَ جھان ءِ سد نامداریں مردمانی لڑا ھوار کرتگ ءُ من ءَ نیو یارک ءَ ٹائم ایونٹ ءَ بھر زورگ ءِ لوٹ کرتگ، پہ اے ایونٹ ءَ منی جھاز بوتگ من ءَ دوشی چہ کراچی ءَ نیو یارک ءَ روگی بوتگ جناہ بالی پٹ کراچی ءَ درسیں چیزانی پیلو کنگ ءَ پد امیگزیشن ڈیپارٹمنٹ ءَ من ءَ سپر ءَ روگ ءَ نہ اشتگ۔ وھدے کہ من سوب ءِ جست گرگ ءِ جھد کرتگ گڑا ایپ آئی اے ءِ زمہ وار چہ ھمود ءَ پاد آتکگ ءُ شتگ۔ من ءَ درکانودی داں پنچ اداراں بالی پٹ ءَ داشتگ اِش۔
آئی ءَ گوشتگ کہ وھدے منی جھاز ءِ وھد ھلاس بوتگ گڑا من چہ اود ءَ درکپتگ آں گڑا ایپ آئی اے ءِ جنینیں سروگانے ءَ منی پاسپورٹ زرتگ ءُ پد ءَ نہ داتگ۔ من داں یک ادارے ءَ گیش گوں آئی ءَ تران کرتگ گڑا رند ءَ منی پاسپورٹ من ءَ داتگ ئِے۔ وھدے کہ ما چہ بالی پٹ ءَ واتر گس ءَ آھگ ءَ اَت ایں گڑا چہ بالی پٹ ءَ پنچ دمان ءَ پد ءَ ڈرائیور ءِ سر ءَ دوبر ریاستی چیریں ادارہ سند پولیس ءِ کارمنداں ارش کرتگ ءُ مئے گاڑی داشتگ۔ ایشی تہ ءَ من ءُ سمی مئے دگہ جنینے ھمبلے ساڑی اَت ایں۔ گاڑی ءِ دارگ ءِ ھواری ءَ آیاں ڈرائیور چہ گاڑی ءَ کش اتگ ءُ لٹ شاپ کنگ بندات کرتگ، چہ گاڑی ءَ چابی ھم کش اتگ اَنت ءُ گاڑی بند کرتگ۔
ڈاکٹر ماہ رنگ ءَ گوشتگ کہ گاڑی ءِ چاریں دروازگ اِش پچ کرتگ اَنت ءُ مئے سیٹانی چیر چارتگ اَنت۔ گاڑی سرجم ءَ پٹ ءُ پول اِش کرتگ، وھدے کہ ما جست گرگ لوٹ اِتگ گڑا آیاں مارا چہ گاڑی ءَ کش اِتگ۔ مئے سریگ چک اِتگ اَنت، مارا زاہ داتگ اِش ءُ سکا آزار داتگ۔ چہ ایشی پد مئے بیگ پہ زور برتگ آیاں چہ بیگ ءَ منی پاسپورٹ، موبائل پون ءُ گاڑی ءِ چابی زرتگ اَنت۔ ما داں شپ ءِ یک ءَ ھما ابتکیں شھدگ ءَ اوشتاتگ ایں دو ویگو آتکگ ءُ مردماں مارا ترسینتگ ءُ بدیں زاہ داتگ ءُ شتگ اَنت۔ ما اود ءَ پہ وت ءَ پھریز سرپد نہ بوتگ ایں وتی گاڑی یل داتگ ءُ دگہ ٹیکسی یے گپتگ ءُ گس ءَ آتکگ ایں۔ اے یک دردناکیں ساھتے اَت کہ اے ڈیھ ءِ تہ ءَ مئے گون ءَ مردمی ھکانی کارکن ءُ بلوچ بوگ ءِ بنیاد ءَ رسترانی وڑ ءَ پیش بوتگ اَنت۔
آئی ءَ گوشتگ کہ زی منی سپر ءِ دارگ ءُ منی گون ءَ چونیں رویشت ءَ پیش بوتگ اَنت، چہ ایشی ھمے گپ پدر بیت کہ ریاست پاکستان ءَ اچما مئے زندمان ءِ ھک ھم پل اِتگ اَنت ءُ پما دگہ مردمی ھک ھچ پشت نہ کپتگ۔ شما ھمے گمان کرت کن اِت کہ منی کِر ءَ یو ایس اے ءِ ویزہ ءُ یک میان استمانی میگزینے ءِ داوت نامگ بوتگ، پد ءَ ھم من ءَ داں پنچ اداراں داشتگ ءُ سپر ءَ نہ اشتگ، ترسینتگ ءُ منی موبائل پون، پاسپورٹ ءُ گاڑی ءِ چابی ھم برتگ اَنت۔ شما ھمے بہ جیڑ اِت کہ اے مردم بلوچستان ءَ لس مردمانی گون ءَ کھام داب ءَ پیش بنت۔
ڈاکٹر ماہ رنگ ءَ گوشتگ کہ من اے پریس کانپریس ءِ پارست ءَ ریاست ءُ آئی اے درسیں ادارھاں کلوہ دیگ لوٹ آں کہ چہ اے وڑیں ھیلھاں ما بے توار نہ بہ ایں ءُ نہ کہ بلوچستان ءَ مردمی ھکانی پادمالیانی سر ءَ توار چست کنگ ءَ بند کن ایں۔ بلکیں اے وڑیں گامگیج مئے توکل ءَ گیس بلند کنت ءُ گیش مھکم بہ ایں ءُ بلوچستان ءَ مردمی ھکانی پادمالی بلوچ چکچینی ءِ بگیری ءَ توا چست کن ایں۔ من مردمی ھکانی درسیں ڈیھ ءُ میان استمان ءِ گلانی گون ءَ لوٹ کن آں کہ زیکیں مئے گون ءَ بوتگیں ویل ءَ ھوار بلوچستان ءَ مردمی ھکانی ناھکیں پادمالیانی سر ءَ پاکستان ریاست ءَ جست بگر اَنت ءُ بلوچ راج ءِ بنیادی مردمی ھکانی پھریزگ ءَ کرد ءَ پیلو بہ کن اَنت۔
