ڈیرہ بگٹی: سوئی ءِ جتائیں ھنداں دو روچ اِنت کہ زورگریں پاکستانی لشکر ءِ لشکرکشی برجاہ اِنت۔ لشکرکشی ءِ میان ءَ سلاہ بندیں مردمانی اُرشانی درچ برجاہ اَنت۔
اھوالکار ءِ رد ءَ زی پاکستانی لشکر ءَ سوئی ءِ ھند لنجو، سگاری، رئیس توک ءَ ھوار کشمور ءَ روکیں کچی کینال ءِ موھن دگ سرجم ءَ بستگ۔ دوشی زورگریں پاکستانی لشکر ءَ لس آدیانی سر ءَ تیرگواری ءُ گولا آس دیگ بندات کرتگ۔
دومی نیمگ ءَ لس آبادیانی سر ءَ اُرش کنوکیں پاکستانی لشکر ءِ کارمند چہ سلاہ بندیں مردمانی نیمگ ءَ جتائیں جاھاں نشانگ کنگ بوگ ءَ اَنت۔
بنشون ءِ رد ءَ سلاہ بندیں مردماں لجو ءَ زورگریں پاکستانی لشکر ءِ کاروان ءِ سر ءَ اُرش کرتگ، اُرش ءِ آسر ءَ یک بکتر بند گاڑی یے تباہ بوتگ ءُ پاکستانی لشکر ءِ جانی تاوان ءِ ھال اِنت۔
ھمے وڑ ءَ رئیس توک ءَ لشکرکشی ءِ میان ءَ سلاہ بندیں مردماں پاکستانی لشکر ءِ پانزہ گاڑیانی کاروان ءِ سر ءَ اُرش کرتگ، اُرش ءِ آسر ءَ پاکستانی لشکر ءِ کارمندانی مرگ ءُ ٹپی بوگ ءِ ھال اِنت۔ لاش ءُ ٹپی بوتگیں کارمند نادراھجاہ ءَ برگ بوتگ اَنت۔
