اے ایوک ءَ مردمی اگبالانی لگتمالی نہ اِنت بلکیں تْرام اتگیں چک چینی یے، زیتیں میان راجی دزمانجنی المی اِنت۔
شال – بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ وتی ستمبر 2024 ءِ گزارش شنگ کرتگ کہ ایشی ءِ تہ ءَ بلوچستان ءَ مردمی اگبالانی لگتمالی ءِ تہ ءَ بے تاھیر کنوکیں گیشی ءِ سر ءَ چمشانک دیگ بیتگ۔ گزارش ءِ تہ ءَ 41 زور بیگواھی ، 3 در آمیدگسی کوش ءُ 25 آزار دئی ءِ جیڑہ نبشتہ کنگ بیتگ اَنت۔ گزارش ءِ رد ءَ سان بیتگیں مردم پاکستانی لشکر ءُ چیریں واکاں نشانگ کرتگ اَنت ۔
پانک ءَ اے زوراکی ایر جتگ ءُ گْوشتگ کہ زور بیگواھی ، در آمیدگسی کوش ءُ گوں بلوچ شھرمننداں در مردمی روشت چہ پاکستانی لشکر ءِ نیمگ ءَ بلوچ راج ءِ سر ءَ پہ زانت زوراکی ءِ کار ءُ کردانی درشان اِنت۔ اے ایوک ءَ مردمی اگبالانی لگتمالی نہ اِنت بلکیں تْرام اتگیں چکچینی یے کہ ایشی ءِ تہ ءَ زیتیں میان راجی دزمانجنی پکار اِنت۔
چہ پانک ءِ نیمگ ءَ دلگوش گْور کنگ بیتگ کہ باز مردم زور بیگواک کنگ بیتگ ، آ سک آزار دیگ بیتگ اَنت۔ زور بیگواہ کنگ بیتگیں مردمانی ٹپ ءُ ٹوریں کنٹ چگل دیگ بہ اَنت۔
اے گزارش ءَ بیگواھیں مردماں ابید دو برات بیست سالی ئیں مھمد اسمائیل ءُ ھپدہ سالی ئیں مھمد عباس ءِ بے دردی ءَ کُشگ ءِ ھال ھم ھوار اِنت کہ پاکستانی لشکریاں ماں کلات ءَ چہ وتی لوگ ءَ آوار ءُ جتگ ءُ پد ءَ کشتگ اَنت۔ دگہ یک دلپدردیں ویلے ھکمت اللہ ءِ بیتگ کہ نوشکے ءَ پرامنیں زھرشانی ءِ وھد ءَ چہ تیرگواری ءَ بیران بیتگ ءُ ستمبر ءَ کراچی ءِ نادْراھجاہ ءَ چہ بازیں ٹپ ءُ ٹوراں بیران بیتگ۔
پانک ءَ پاکستان ءِ پورتھ شیڈول ءِ شوندات ءِ کارمرد کنگ ءِ نیمگ ءَ ھم دلگوش گْور کرتگ ءُ گْوشتگ کہ ایشی ءِ تہ ءَ ھزاراں سیاسی کارکن، نودربر، ڈاکٹر ءُ کارمندانی سر ءَ اے دروگیں بھتام بندگ بیتگ کہ آ گوں آجوئی دوستیں سلاہ بندیں گلاں بندوک اَنت ، گْور ایشی ءَ آیانی سر ءَ چاریگی ءِ موکل دیگ بیتگ۔
گزارش ءِ تہ ءَ گْوشگ بیتگ کہ اے شوندات ءَ ایمنی دوستیں جھدکارانی آزار ءُ دلسیاہ کنگ سانمندیں رنگے ءَ راھبندی لیک اِتگ ۔مھترھندی لشکر ءَ بے گر ءُ بند ءَ دزگیر کنگ، آزار دیگ ءُ کشگ ءُ چگل دیگ دیگ ءِ موکل رس اتگ۔
پانک چہ میان راج ءَ لوٹ کنان ءَ گْوشتگ، ما لوٹ کن ایں کہ میاں راجیں سروک اے جنگی میارانی پٹ ءُ پول ءَ بہ کن اَنت ءُ پاکستان ءَ بلوچ چکچینی ءِ زمہ وار بہ لیک اَنت۔ اے گواچنیں گپ اَنت کہ ھچ پیم کس دروگ گْوشت نہ کنت پمیشکا جھان ھم چد ءُ گیش اے بارہ ءَ بے توار بیت نہ کنت۔
