شال : بلوچ راجی سروک استاد واھد کمبر ءَ وتی درشانے ءَ بلوچ راج ءُ راجی جھدکاراں نوکیں سال ءِ مُراد باتی داتگ ءُ گْوشتگ کہ گْوستگیں سال گوں کھر گْواریں درد ءُ دوراں آسر بوت۔گْوستگیں سال ءَ راجی جُھدکار ءُ سرمچاراں دُژمن جانی ءُ مالی تاوان ءِ دیمپان کرتگ ءُ دُژمن ءَ ھم بلوچانی سر ءَ بے کچیں زوراکی کرتگ۔
آئی ءَ گْوشتگ کہ ھمک گْوستگیں سالانی وڑ ءَ راجی سرمچار ءُ جُھدکاراں دُژمن گیشتر تاوان داتگ ۔ گْوستگیں سال ءَ بازیں تنگھیں سرمچاراں پہ زمین ءُ راجی آجوئی ءَ وتی گرانبھائیں جان ندر کرتگ اَنت۔
آئی ءَ گْوشتگ کہ آجوئی دیمونی ءَ ابید نہ رس ایت۔ اے سال ءَ مارا مسام نوک کنگی اِنت کہ داں سرڈگار ءُ راجی آجوئی ءَ مئے دیمونیانی دْرچ یکشل ءَ برجاہ بیت۔
استاد واھد کمبر ءَ گْوشتگ کہ دژمن ءَ پروش وارتگ ءُ سوب بلوچ راج ئیگ اِنت، اے سال ءَ مارا وتی گام پہ آجوئی ءِ منزل ءَ تیز کنگی اَنت۔نوکیں سال بلوچ راج ءُ راجی جُھدکاراں مُراد بات ءُ اے سال پہ بلوچ سرڈگار ءَ آجوئی ءِ سال بات۔
