اکوام متھدہ ءِ مردمی ھکانی کونسل ءِ پنجاہ ءُ ھپتمی نیاد ءِ میان ءَ بیگواھیں بلوچانی توار ( بی وی ایم پی ) ءِ کارگشاد سمی دین ءَ تران کرتگ ءُ گوشتگ کہ بلوچستان ءَ پاکستانی لشکر ءُ چیریں ادارھانی کاروائی پہ مردمگری ءَ تباھی یے ودی کنگ ءَ اَنت۔
آئی ءَ گوشتگ کہ چنچو سال اِنت بلوچ ریاستی زوراکیانی آماچ اِنت، میان استمانی راج پہ زور بیگواھیں بلوچانی آجوئی ءَ وتی کرد ءَ پیلو بہ کن اَنت۔
سمی دین ءَ تران ءِ تامربند ماں چاگردی رسانکدر ءَ شنگ کرتگ ءُ نبشتگ کہ من گوں کونسل بلوچستان ءَ مردمی ھکانی بگیری ءُ زوریں بیگواھیانی باروا سرپدی داتگ۔
آئی ءَ گوشتگ کہ منی سر ءَ بے جاریں پابندیاں ابید، آئی ءِ مول منی ھمے پرواگرام ءَ دارگ ءُ منی بے توار کنگ اَت۔ من پرنٹ لائن ڈیپنڈرز ( ایپ ایل ڈی ) ءِ منتوار آں کہ آئی منی توار ءُ من ءَ وتی باروا گپ کنگ ءَ موہ داتگ۔
