بلوچ یکجھتی کمیٹی ءِ جارکش ءَ گوشتگ کہ 2 اگست ءَ نوشکے ءَ بلوچ راجی مچی ءِ نندانک ءِ سر ءَ پاکستانی لشکر ءِ تیرگواری ءِ سوب ءَ یک ورنایے شھید ءُ دو ٹپی بوتگ اَنت۔ ٹپی بوتگیں مردمانی تہ ءَ یک ورنایے ھمکت اللہ ءَ گٹ ءَ تیرے ءَ سپتگ ھمے سوب ءَ گوستگیں چل روچ اِنت کہ سکا گوں ناگیگیں جاوراں درمان ئِے کنگ ءَ بوتگ اَنت۔ چہ شال ءَ ٹراما سینٹر ءَ درمان کنگ ءَ پد پہ شرتریں درمان ءَ کراچی ءَ برگ بوتگ۔ مرچی کراچی ءَ یک نادراھجاھے ءَ آئی ٹپانی درد نہ سگ اِتگ اَنت ءُ شھید بوتگ۔
آئی ءَ گوشتگ کہ پہ بلوچ راجی مچی ءِ دارگ ءَ ریاست ءَ بلوچستان ءِ جتائیں شھراں زوراکی ءِ سیمسر گواز کرتگ اَنت۔ ھمے سوب ءَ سے ورنا شھید ءُ سی ءِ نزیک ءَ سکا ٹپی بوتگ اَنت۔ شھید ھکمت اللہ ھم ھمے ٹپی بوتگیں مردمانی تہ ءَ ھوار بوتگ کہ آ آدینگ ءِ روچ ءَ کراچی ءَ شھید بوتگ۔ پہ راجی مچی ءِ آھوکیں کاروان ءُ پد ءَ نندانکانی میان ءَ بوتگیں اُرشاں ٹپی بوتگیں مردم جتائیں نادراھجاھاں درمان کنگ بوگ ءَ اَنت ءُ چہ آیاں لھتین ءِ جاور ناگیگ اَنت۔ چہ آیاں مستونگ ءِ جاہ منند متلب ھم ھوار اِنت۔
آئی ءَ گوشتگ کہ ریاست بلوچ لس مردمانی چہ سیاسی ءُ راجی جھد ءَ ترس آماچ اِنت ءُ پہ اے زرمبشت ءِ ھلاس کنگ ءَ زور ءُ آزادھی کارمرز کنگ ءَ اِنت۔ بلے درسیں ریاستی زوراکیاں ابید ریاست بلوچانی توکل ءِ پروشگ ءَ بے سوب بوتگ۔
آئی ءَ گوشتگ کہ بلوچ چکچینی ءِ بگیری ءَ چست بوتگیں اے زرمبشت اے وڑیں زوراکیانی دیمپان اِنت کہ اے ریاست بلوچ چکچینی کنگ ءُ پیداک اِنت۔ ما سدک ایں کہ بلوچانی دیمونی یک روچے الم رنگ کار اَنت ءُ بلوچ سرڈگار ءِ سر ءَ زوراکی پہ مدامی ھلاس کنگ بیت۔ زوراکی ءُ تونگری گوں ھاکاں ھوار بیت ءُ بلوچانی جھد گوں سوبمندی ءَ ھمگرنچ بیت۔
آئی ءَ گوشتگ کہ شھید ھکمت اللہ ءِ دیمونی پہ مدامی گیر آرگ بنت ءُ اے دیمونی پہ بلوچ راجی زرمبشت ءَ مادنیں راہ بنت۔
