شال: زور بیگواھیں ڈاکٹر ابدالھی ءِ کھول ءَ چہ وی بی ایم پی ءِ زھرشانی نندانک ءَ پریس کانپریس کرتگ ءُ گوشتگ کہ آواران بیدی ءِ جاہ منند ءُ آواران ڈی ایچ کیو نادراھجاہ ءِ آپریٹنگ تھیٹر اسسٹنٹ ڈاکٹر ابدالھی یک جون 2024 ءَ زور بیگواہ کنگ بوتگ۔ آئی ءَ پاکستانی لشکر ءُ چیریں ادارھانی کارمنداں چہ آئی نادراھجاہ آواران نوندڑہ ءَ چمان ءَ پٹی بستگ ءُ توپک ءِ زور ءِ سر ءَ گوں وت برتگ۔ چہ ھما روچ ءَ داں مرچی آئی ھچ وڑیں ھال نیست ءُ داں مرچی ءَ مارا آئی سلامتی ءِ ھال دیگ نہ بوتگ۔
آئی ءَ گوشتگ کہ اے تیوک ءَ یک جیڑھے نہ اِنت، بلکیں آواران ءِ وڑیں پدمنتگیں ھندے ءَ ھمک روچ گساں بیڑ برگ ءَ اَنت۔ اود ءَ جنین ءُ زھگ، کماش ترسینگ ءُ زوراکیانی نشانگ کنگ بوگ ءَ اَنت۔ آیانی آزیزاں آیانی چمانی دیم ءَ چمان بندگ ءُ زور بیگواہ کنگ ءَ اَنت۔ آواران نادرھجاہ ءِ ڈاکٹر یکشل ءَ بیگواہ کنگ بوگ ءَ اَنت۔ بلے سرکار اے جیڑہ ءَ گوں سنگینی ءَ چارگ ءَ نہ اِنت ءُ نہ اے جیڑہ ءِ باروا گامگیج زورگ ءَ اَنت۔ بلے سرکار مرچی ھم واب اِنت۔
آئی ءَ گوشتگ کہ اگاں سرکار ءَ وتی بے تواری ھمے وڑ ءَ برجاہ داشت گڑا ڈاکٹر ابدالھی ءِ کھول ءِ نیمگ ءَ ترندیں گامگیج زورگ بیت۔ نوں ما اوپار کرت نہ کن ایں۔ ما وتی سر ءَ اے گرانیں جنجال ءُ واکدار ءِ بے تواری ءَ ھچ وڑیں اوپار کرت نہ کن ایں۔
آئی ءَ گوشتگ کہ من ڈاکٹر البدالھی ءِ گھار اے پریس کانپریس ءِ پارست ءَ انوگیں سرکار ءُ زمہ واراں گوشگ لوٹ آں کہ من داں دہ روچ ءَ ودار کن آں اگاں اے دہ روچانی تہ ءَ منی برات آجو نہ بوت گڑا ما لاچار ایں کہ آواران نادراھجاہ ءَ کبل کن ایں ءُ آئی دیم ءَ نندانک ءَ برجاہ دار ایں۔ اے نندانک داں ھما روچ ءَ برجاہ بیت دانکہ منی برات ڈاکٹر ابدالھی آجو نہ بوتگ۔ اگاں اے میان ءَ اچما کسے ءَ تاوان بوت گڑا ایشی درسیں زمہ واری ریاست ءِ سر ءَ بنت۔
