بلوچ نودربر گل پجار ءِ جارکش ءَ وتی درشانے ءَ گوشتگ کہ مکران جاندراھی تک ءِ وانشجاہ ءِ نودربر گوستگیں چنچو روچ اِنت پہ ھکی ءُ بنکی لوٹاں زھرشانی کنگ ءَ اَنت، بی ایس او پجار آیانی درسیں لوٹانی ھک ءَ پلہ مرزی ءِ جار جنت ءُ ھمے لوٹ کنت کہ نودربرانی ھکی ئیں لوٹ منّگ بہ بنت۔
آئی ءَ گوشتگ کہ بلوچستان ءِ جتائیں جاندراھی وانشجاھانی ھمے ھال اِنت لوڑ ءُ گوڑ کنگ ءَ وانگجاہ تباھی ءِ نیمگ ءَ برتگ اَنت۔ سرکار ءُ واکدارانی دلگوش گوں لوڑ ءُ گوڑ، ٹیکہ ءُ کمیشن ءَ اِنت ءُ مئے وانگجاہ بے کمک ءَ کپتگ اَنت۔ وانشجاہ ءِ واکدار نودربرانی ھکاں دیگ ءَ نہ اِنت، نودربرانی وانگ ءِ وھد ءَ زھرشاکی کنگ پما پژنی گپے۔
آئی ءَ گوشتگ کہ تربت ءِ گرم انچو گیش اِنت وانگجاہ ءَ گوستگیں شش روچ اِنت لین نیست ءُ جرنیٹر ءُ آدگہ آسراتی نیست۔ اے پہ وانشجاہ ءِ واکدار، سرکار ءُ سرکاری سروکاں شرم ءِ گپے۔
جارکش ءَ گوشتگ کہ وانشجاہ ءِ واکدار، سرکار ءُ سرکاری سروک زوت مکران جاندراھی تک ءِ وانشجاہ ءِ نودربرانی لوٹاں بہ منّ اَنت ءُ ایشی سر ءَ کار بہ کن اَنت، اگاں نہ وانشجاہ ءِ واکدار ءُ اے وھد ءِ سرکار ءَ نابودی کرتگ اے زھرشانی ءِ ھواری ءَ بی ایس او پجار سرجمیں بلوچستان ءَ زھرشانی زرمبشتے برجاہ دار ایت۔۔
