بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانے ءَ گوشتگ کہ مکران جاندارھی تک وانشجاہ ءِ نودربرانی زھرشانی ءُ آیانی لوٹانی پلہ مرزی ءَ کن ایں۔ مکران جاندراھی وانشجاہ کہ آئی ءَ سک دیر اِنت واکداری جیڑھانی بنجاہ جوڑ بوتگ۔ چہ ایشی نودربرانی وانگ ءِ سر ءَ سان کپگ ءَ اَنت۔ واکدار پہ اے جیڑھانی گیش ءُ گیوار کنگ ءَ نابود اِنت ءُ روچ پہ روچ ءَ نودربرانی جنجال گیش بوگ ءَ اَنت۔
آئی ءَ گوشتگ کہ جاندراھی وانشجاہ ءِ نودربرانی لوٹ ھکی ئیں لوٹ اَنت زھرشانی کنگ آیانی بنیادی ھک اِنت۔ ایشی نہ تیوک ءَ پلہ مرزی ءَ کن ایں بلکیں آیانی لوٹانی ھک ءَ گوں آیاں ھواری ءَ اوشتاتگ ایں۔ گوں سرکار، وانگی جاندراھی تک ءُ جاندارھی وانشجاہ ءِ واکدار ءِ گون ءَ لوٹ کن ایں کہ آ نودربرانی ھکی ئیں لوٹاں بہ منّ اَنت ءُ زوتاں چہ زوت آیانی جیڑہ ءَ گیش ءُ گیوار بہ کن اَنت۔
