بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ ھیروپ آپریشن داں بیست اداراں برجاہ بوتگ گوں سوبمندی ءَ آسر بوتگ۔ اے آپریشن گڈی آسر ءَ سرکرتگ ءُ بی ایل اے مجید برگیڈ ءِ نو پدائی ءُ پتہ اسکواڈ ءِ یک نہ ترسے شھید بوتگ۔ وھدے کہ آپریشن ءِ میان ءَ 130 دژمنیں کارمند مرتگ اَنت۔
جارکش ءَ گوشتگ کہ ھیروپ آپریشن ءِ میان ءَ بی ایل اے ءِ مجید برگیڈ ءِ جھل ءَ داتگیں لڑ کہ پدائی شھید بوتگ اَنت۔ آپریشن کمانڈر پدائی شھید گوس بکش سمالانی پنام تالب ء میشدار سمالانی شاھرگ ترکڑی ءِ جاہ منند اِنت۔ آ 2019 ءَ بی ایل اے ءَ ھوار بوتگ ءُ پہ راجی آجوئی ءِ گرگ ءَ بولان ءِ جنگاں وتی پرز ءِ پیلو کرتگ۔ آئی پت میشدار سمالانی ھم بی ایل اے ءِ یک نہ ترسیں سرمچارے اَت، آئی نومبر 2022 ءَ زورگریں پاکستانی لشکر ءِ بگیری ءَ یک میڑے ءَ دیم پہ دیمی جنگ داتگ شھید بوتگ۔ وھدے کہ آئی کستریں برات شھید پدائی سنگت مھمد بکش پنام ھالد ء میشدار سمالانی ھم مجید برگیڈ ءِ یک پدائی یے بوتگ۔ سنگت پدائی گوس بکش 2022 ءَ بی ایل اے مجید برگیڈ ءَ وتی واھشت پیش کرتگ۔ آ ھیروپ آپریشن ءَ بی ایل اے مجید برگیڈ ءِ بیلہ بنجل ءِ سر ءَ ارش ءَ آپریشنل کماندار بوتگ۔ آپریشن ءِ میان ءَ آئی ھمبلانی سروکی کرتگ ءُ وتی جنگی بودناکی جوانیں وڑے ءَ کارمرز کرتگ اَنت ءُ دژمن ءِ بازیں کارمند کشتگ۔ آ جنگ ءِ بندات ءَ ٹپی بوتگ، بلے ٹپی بوگ ءَ ابید داں 20 دمان ءَ دژمن ءِ گون ءَ مڑ اتگ۔
آئی ءَ گوشتگ کہ شھید پدائی سنگت ماھل پنام زلان کرد ء کھدہ ھمید گْوادر ءِ ھند سربندر ءِ جاہ منند اِنت، بیست دو سالیگیں ماھل لا وانشجاہ تُربَت ءِ ایل ایل بی ءِ ھشتمی بھرگ ءِ نودربرے۔ آئی 2022 ءَ بی ایل اے ءَ ھوار بوتگ ءُ راجی ایردستی ءِ بگیری ءَ سلاہ بندیں جھد ءِ راہ گچین کرتگ۔ آئی ءَ ھمے سال ءَ پہ رزا بی ایل اے مجید برگیڈ ءَ وتی واھشت پیش کرتگ اَنت۔ بی ایل اے ءِ ھیروپ آپریش ءَ بیلہ بنجل ءِ آپریشن ءِ بندات آئی گوں تراکناکیں شورھاں باریں گاڑی یے دژمن ءِ بنجل ءِ مزنیں دروازگ ءَ جتگ۔ چہ ھمیشی سوب ءَ مجید برگیڈ ءِ پدائیاں بنجل ءَ پترگ ءَ موہ رستگ۔ آ بلوچ جنینانی تہ ءَ سیاسی زانشت ءَ بلد بوتگ۔ آئی دیمونی ءَ یکبرے پد ءَ پیش داشتگ کہ بلوچ راجی آجوئی زرمبشت ءُ بی ایل اے ءَ مرد ءُ جنینی پرک ھلاس کرتگ ءُ اے جھد ءَ درسیں بلوچ جنین یک وڑ ءَ ھوار اَنت۔
جارکش ءَ گوشتگ کہ شھید پدائی سنگت رزوان پنام ھمل ء مولابکش گْوادر ءِ ھند پاوان ءِ جاہ منند اِنت۔ اے بیست ءُ دو سالیگیں رزوان 2022 ءَ بی ایل اے ءَ ھوار بوتگ ءُ ھمے سال ءَ بی ایل اے مجید برگیڈ ءَ وتی واھشت پیش کرتگ اَنت۔ آئی اے آپریشن ءَ تراکناکیں شورہ ءَ باریں دومی گاڑی دژمنیں لشکر ءِ بیلہ بنجل ءِ دومی نیمگ ءَ جتگ ءُ دژمن ءِ ھوش برتگ ءُ نہ ترسی ءِ درورے زندگ داشتگ ءُ شھید ءِ نام کٹ اِتگ۔
آئی گوشتگ کہ شھید پدائی مھمد پنام میرک ء سئید اھمد چنگیزی پنجگور ءِ ھند سوراپ تسپ ءِ جاہ منند اِنت۔ بیست دو سالیگیں مھمد 2022 ءَ بی ایل اے ءَ ھوار بوتگ ءُ راجی ایردستی ءِ بگیری ءَ وتی پرز ءِ پیلو کنگ ءَ بوتگ۔ وھدے کہ 2023 ءَ آئی پہ بی ایل اے مجید برگیڈ ءَ وتی واھشت پیش کرتگ اَنت۔ آ بی بی اے مجید برگیڈ ءِ پدائی سنگت رئیس ءِ سیاد اِنت۔آئی 2018 ءَ زورگریں پاکستان ءِ شریدار چینی کونسلیٹ ءِ سر ءَ اُرش کرتگ۔
جارکش ءَ گوشتگ کہ شھید پدائی سنگت پزل گل زھری پنام شاویز ء گل مھمد زھری ھزدار ءِ جاہ منند اِنت۔ آ 2022 ءَ بی ایل اے ءَ ھوار بوتگ ءُ کوھی جنگ ءَ راجی ایردستی ءِ بگیری ءَ وتی پرز پیلو کرتگ، وھدے کہ آئی ھمے سال ءَ مجید برگیڈ ءَ بھر زرتگ۔ پدائی پزل گل زھری یک ٹک تیرے بوتگ، بیلہ بنجل ءَ اُرش ءِ میان ءَ درزنانی کچ ءَ دژمنیں لشکر ءِ نشانگ گپتگ ءُ آیان ءَ جاھی کشتگ ءُ آدگہ پدائیان ءَ دیم ءَ روگ ءِ موہ داتگ۔
آئی ءَ گوشتگ کہ شھید پدائی سنگت تیب پنام لالا ء مولا بکش نوشکے ءِ ھند اھمد وال ءِ جاہ منند اِنت۔ آ 2022 ءَ بی ایل اے ءَ ھوار بوتگ ءُ کوھی جنگ ءِ سر ءَ ایردستی ءِ بگیری ءَ پرکار بوتگ۔ چہ ایشی پیش آئی زورگریں ریاست پاکستانی لشکر ءَ ھوار بوتگ، بلے آئی ایردستی مار اتگ ءُ ھمے سوب ءَ زوگریں لشکر ءِ نوکری یل داتگ ءُ درانڈیھ ءَ شتگ ءُ ایمن بوتگ، پد ءَ آئی درانڈیھی رکست کرتگ ءُ پہ وتی راجی زمہ واریانی پیلو کنگ ءَ بلوچ راجی جنگ ءَ ھوار بوتگ۔ بیست ءُ سے سالی پدائی مھمد تیب 2023 ءَ بی ایل اے مجید برگیڈ ءَ وتی واھشت پیش کرتگ اَنت ءُ ھیروپ آپریشن ءِ میان ءَ گوں نہ ترسی داں گڈی دمان ءَ مڑ اتگ۔ تیرانی آسری ءَ پد وت ءَ جتگ ئے شھید بوتگ۔
جارکش ءَ گوشتگ کہ شھید پدائی سنگت جنید زھری پنام کامی ء ڈاکٹر ابدالوھاب زھری ھزدار ءِ ھند ساموانی زھری ءِ جاہ منند اِنت۔ بیست سالیگیں جنید 2023 ءَ بی ایل اے ءَ ھوار بوتگ ءُ آئی ھما سال ءَ وت ءُ واھشت پہ مجید برگیڈ ءَ پیش کرتگ۔ آ سکا ایماندار ءُ ھدا دادیں جنگی بودناکیاں سریچیں ھمبلے اَت، ھیروپ آپریشن ءِ میان ءَ آئی داں بیست اداراں گیش یکشل ءَ مڑ اتگ۔
آئی ءَ گوشتگ کہ چہ اے سنگتاں ابید بی ایل اے ءِ مجید برگیڈ دو پدائی شھید مھمد آسپ نیچاری ءُ شھید پدائی مھمد بکش سمالانی ھم ھیروپ آپریشن ءِ بھر بوتگ اَنت، آدگہ پدائی ھمبلانی گون ءَ ھوار بوگ ءَ بیلہ ءِ نیمگ ءَ سپر ءَ بوتگ اَنت کہ راہ ءَ دوئیں ھمبل دژمن ءِ گون ءَ ھما وھد ءَ دیم پہ دیم بوتگ اَنت کہ آ پہ وتی نشانگ ءَ چہ مستونگ ءَ سپر ءَ بوتگ اَنت۔ 19 اگست 2024 ءَ زورگریں پاکستانی لشکر ءِ گون ءَ دیم پہ دیمی ءَ پد دوئیناں داں اداراں دژمنیں لشکر ءِ گون ءَ مڑ اتگ اَنت، ھپت دژمنیں کارمندانی کشگ ءَ پد شھید بوتگ اَنت۔
جارکش ءَ گوشتگ کہ شھید پدائی مھمد آسپ نیچاری پنام نوید ء شپی مھمد کلات ءِ ھند منگچر ءِ جاہ منند اِنت۔ آ 2023 ءَ بلوچ راجی ایردستی ءِ بگیری ءَ سلاہ بندیں جھد کنگ ءَ بوتگ ءُ ھمے سال ءَ پہ بی ایل اے مجید برگیڈ ءَ وتی واھشت ئِے پیش کرتگ اَنت۔ سنگت آسپ یک جپاکشیں ھمبلے اَت، آئی دژمن ءِ بگیری ءَ چنچو جنگاں بھر زرتگ ءُ جوانیں کرد پیلو کرتگ۔
آئی ءَ گوشتگ کہ شھید پدائی سنگت مھمد بکش سمالانی پنام ھالد ء میشدار سمالانی شاھرگ ءِ ھند ترکڑی ءِ جاہ منند اِنت۔ آئی ھیروپ آپریشن ءَ مجید برگیڈ ءِ آپریشن کماندار پدائی گوس بکش سمالانی پنام تالب ءِ کستریں برات اَت۔ سنگت مھمد بکش 2021 ءَ بی ایل اے ءَ ھوار بوتگ ءُ 2023 ءَ پہ مجید برگیڈ ءَ وتی واھشت پیش کرتگ اَنت۔ آئی پت میشدار سمالانی ھمے وڑ ءَ سکا جپاکش ءُ ایمانداریں ھمبلے اَت، آئی پت ءُ برات ءِ وڑ ءِ دژمن ءِ گون ءَ دیم پہ دیمی جنگ داتگ ءُ شھید بوتگ۔
جارکش ءَ گوشتگ کہ ھیروپ آپریشن ءِ میان ءَ مستونگ ءِ ھند کڈ کوچگ ءَ زورگریں پاکستانی لشکر ءِ گون ءَ میڑ ءَ بی ایل اے پتہ اسکواڈ ءِ یک نہ ترسیں ھمبلے شپکت مینگل گوں نہ ترسی ءُ جوانمردی ءَ دژمن ءِ گون ءَ میڑ اتگ ءُ شھید بوتگ۔
آئی ءَ گوشتگ کہ شھید سنگت شپکت مینگل پنام دیار ء میر انایت اللہ مینگل واشک ءِ ھند ناگ ءِ جاہ منند بوتگ۔ آ بلوچستان زانشتجاہ ءِ وانشتی بھرگ ءِ بھرگ ءِ نودربرے اَت۔ آ 2023 ءَ بی ایل اےھوار بوتگ ءُ پہ راجی آجوئی ءَ سلاہ بندیں جنگ بندات کرتگ۔ آئی کلات ءِ ھند ناگاھو ءَ وتی جنگ ءِ پرز پیلو کرتگ اَنت، سنگت شپکت وتی بودناکی ءُ جنگی کارشونیانی سوب ءَ زوت بی ایل اے اولی ٹولی پتہ اسکواڈ ءِ بھر بوتگ۔ آئی بازیں جنگاں چہ وتی جنگی بودناکیاں دژمن پروش داتگ۔
جارکش ءَ گڈی ءَ گوشتگ ی ءِ بی ایل اے ھیروپ آپریشن ءِ سوبمند کنوکیں اے شھیدانی بے دروریں کرد ءَ ساڑایت ءُ آیانی بے مٹیں دیمونیانی سر ءَ شھیداں ستک شانی ندر کنت ءُ شھیدانی دیمونی ھچ وڑ ءَ شموشگ نہ بنت ءُ آیانی توان ءُ توکل یک آجو ءُ وتواکیں بلوچ ڈیھے برجاہ دار اَنت ءُ شھیدانی لوٹ پیلو کنگ بنت۔
