بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 19 اگست 2024 ءَ سرمچار شھید میجر انجینئر نسراللہ پنام چاکر سراوان، مستونگ ءِ ھند آپ گل ءَ دژمنیں لشکر ءِ گون ءَ دیم پہ دیمی میڑے ءَ شھید بوتگ۔ آئی گوں نہ ترسی ءُ وتی درسیں ھمبل کش اِتگ اَنت ءُ شھیدی ءِ گرانبھائیں نام ئے کٹ اتگ۔
آئی ءَ گوشتگ کہ شھید انجینئر نسر اللہ پنام چاکر 2001 ءَ واجہ مراد گجر مشکے جاہ منند ءِ گس ءَ ودی بوتگ، یک سول انجینئر، سکا کابل، جپاکش، زانوگر، نہ ترس ءُ ایمانداریں بلوچ پسگے اَت، آ بلوچستان ءِ سر ءَ پاکستان ءِ زوریں دستیگی ءُ راجی ایردستی ءِ بگیری ءَ آجوئی جھد ءِ پڑا پہ وتی کرد ءِ پیلو کنگ ءَ 2017 ءَ بی ایل ایپ ءِ لڑا ھوار بوتگ۔ چہ آئی بودناکی ءُ جوانیں کارشونیانی بنیاد ءَ بی ایل ایپ ءَ سراوان ءَ سروکی ءِ زمہ واری داتگ ءُ میجر ءِ اگدہ ءَ گچین کرتگ۔ شھید ءَ وتی زمہ واری جوانیں وڑے ءَ پیلو کرتگ اَنت ءُ ھمبلانی ھمراھی ءَ کسانیں وھدے ءَ بی ایل ایپ ءَ مچ، بولان، مستونگ،کلات، کچھی ءُ سیوی ءَ مھکم کرتگ۔ میجر نسراللہ ھمے ھنداں بلوچ راجی آجوئی سنگر ( براس ) ءِ لشکری کاراں جوانیں کردے پیلو کرتگ۔ چہ وتی وش تبی ءُ نہ ترسی ءِ سوب ءَ داں شھیدی ءَ اوتاک ءِ کمانداری ءِ زمہ واری گون ئے بوتگ اَنت۔
میجر گھرام ءَ گوشتگ کہ بی ایل ایپ شھید میجر نسر اللہ پنام چاکر ءَ بلوچ راجی آجوئی زرمبشت ءَ آئی ایمانداری کرد ءُ راجی کارانی سر ءَ ستک شانی ندر کنت ءُ ھمے کول ءَ کنت کہ داں بلوچستان ءِ آجوئی ءَ شھید میجر نسر اللہ ءُ آدگہ شھیدانی کاروان ءَ برجاہ دار ایت۔
