کلات: جوھان ءَ زورگریں پاکستانی لشکر ءِ جھلی ءُ برزی لشکرکشی برجاہ اِنت۔ زوگریں پاکستانی لشکر ءُ بلوچ سرمچارانی میان ءَ میڑے ءِ ھال اِنت۔
بنشون ءِ رد ءَ جوھان ءِ ھند گیشنک ءَ زوگریں پاکستانی لشکر ءَ بلوچ سرمچارانی انگر کنگ ءِ جھد کرتگ سرمچار ءُ پاکستانی لشکر ءِ میان ءَ میڑے برجاہ بوتگ۔ پہ کمک ءَ پاکستانی لشکر ءِ کارمند بازیں کچے ءَ آھگ ءَ گندگ بوتگ اَنت۔ پہ زمینی لشکر ءِ کمک ءَ جنگی بالگرد ھم آتکگ اَنت ءُ ترّ ءُ گرد کنگ ءَ اَنت۔
ھندی بنشونے ءِ رد ءَ چہ شال ءَ کم چہ کم ھپت جنگی بالگرد آھگ ءَ گندگ بوتگ اَنت، گیشنک ءَ جنگی بالگردانی نیمگ ءَ جتا جتائیں جاھاں تیرگواری ءِ توار اش کنگ بوتگ۔ کوھانی تہ ءَ تراکانی توار ھم اش کنگ بوتگ۔
انچوش گوشگ بوگ ءَ اِنت کہ پاکستانی لشکر ءِ گاڑیانی تہ ءَ ایمبولینس ھم ھوار اَنت۔ پاکستانی لشکر ءِ کارمندانی بازیں کچے ءَ مرگ ءُ ٹپی بوگ ءِ ھال اِنت۔ انگت ءَ چہ بلوچ سرمچارانی نیمگ ءَ ھچ وڑیں جانی تاوان ءِ ھال نیست۔