شال: زور بیگواھیں زھیر اھمد ءِ کھول ءَ شال پریس کلب ءَ پریس کانپریس کرتگ ءُ گوشتگ کہ ھمک روچ زور بیگواھیں مردمانی کھول ھمک روچ کاینت ءُ شمئے پارست ءَ وتی درداں داں جھان ءَ سرکنگ ءِ جھد ءَ کن اَنت بلکیں چہ سالاں زور بیگواھیں مردم واتر وتی گساں سر بہ بنت، ما چہ ھما سانمندیں کھول ءَ ایں۔
آئی ءَ گوشتگ کہ زھیر اھمد ء ڈاکٹر ابداللہ یک سرکاری نوکرے ءُ گوستگیں پانزدہ سال اِنت کہ کلرک ءِ بستار ءَ کار کنگ ءَ اِنت۔ آ 27 جون ءَ پنچ شمبے ءِ ادار دو ءَ چہ وتی کارگس ءَ در کپتگ ءُ جی پی او شال زرگون ءَ وتی گس ءَ کلہ سریاب دگ ءَ روگ ءَ بوتگ کہ گس ءَ سر بوگ ءَ پیش روچ ء رھمان ءَ بیگواہ کنگ بوتگ۔
آئی ءَ گوشتگ کہ زھیر اھمد یک سرکاری نوکرے آئی ءَ گوں ھچ وڑیں سیاسی جست ءُ ایراں کار نیست، آ تیوک ءَ چہ ھونی سیادیانی بنیاد ءَ زھیر اھمد ءَ ھوار آدگہ سیاد وھد وھد ءِ سر ءَ ترسینگ بنت ءُ شپانی تھارونکیاں چنچو بر ءَ گساں بیڑ برگ بوتگ۔
کھول ءَ گوشتگ کہ زھیر اھمد ءَ پاکستانی لشکر، سی ٹی ڈی ءُ چیریں ادارھانی کارمنداں چہ شال ءَ بیگواہ کرتگ آئی باروا ما پریس کانپریس کرتگ ءُ آجوئی ءِ لوٹ کرتگ ءُ زھیر اھمد ءِ یل بہ بوگ ءَ ما لاچار بوتگ ایں ءُ زھرشانی کرتگ۔
آئی ءَ گوشتگ کہ پہ زھیر اھمد ءِ آجوئی ءَ ما چاردہ روچ زھرشانی ءَ نندگ ءِ ھواری ءَ روانک کش اتگ، ھمے میان ءَ پولیس ءَ زھرشانی کنوکانی سر ءَ زور کارمرز کرتگ۔ بیست ءِ نزیک ءَ زھرشانی کنوک دزگیر کنگ بوتگ اَنت۔ آیانی تہ ءَ پنچ جنین ھوار اِنت۔ رند ءَ 14 جولائی ءَ ریڈ زون ءَ سرکار ءِ گون ءَ گپ ءُ تران ءَ زھرشانی کنوکانی یل کنگ، سی ٹی ڈی ءِ سر ءَ ایپ آئی آرنبیسگ ءُ پانزدہ روچانی تہ ءَ زھیر اھمد ءِ یل کنگ ءِ گپ ءِ سر ءَ رازیگ بوتگ ایں۔
آئی ءَ گوشتگ کہ سرکاری پتر ءِ باسکاں ھمے دلجمی داتگ گڑا ما وتی زھرشانی پہ پانزہ روچ ءَ ھلاس کرتگ۔ بلے یک ماھے ءِ گوزگ ءَ پد ھم سرکار ءِ نیمگ ءَ ھچ وڑیں گامگیج زورگ نہ بوتگ۔ اے میان ءَ سرکاری پتر ءِ باسک بس وھد زوالی کنگ ءَ اَنت۔
کھول ءَ دیمتر ءَ گوشتگ کہ اے پریس کانپریس ءِ رد ءَ ما تچکی ءَ گوش ایں اگاں سرکار ءِ نیمگ ءَ داں یک ھپتگے ءَ زھیر اھمد یل کنگ نہ بوت گڑا ما ترندیں زھرشانی کن ایں ءُ زھرشانی نندانک ءَ ھوار روانک ھم کش ایں۔
آئی ءَ گڈی ءَ گوں بلوچستان ءِ سیاسی ءُ چاگردی گلانی ھواری ءَ میان استمانی مردمی ھکانی گلاں لوٹ کرتگ کہ پہ زھیر اھمد ءِ آجوئی ءَ وتی کرد ءَ پیلو بہ کن اَنت۔
