بلوچ یکجھتی کمیٹی ءِ سروک ڈاکٹر ماہ رنگ ءَ بلوچ راج ءِ نام ءَ وتی کلوھے ءَ گوشتگ کہ درساں پیش من شمئے ھمے ھمت، نہ ترسی، راھبند، توکل ءُ باسمائی ءَ دروت ندر کن آں۔ مرچی شما نہ تیوک ءَ پاکستان ریاست بلکیں سرجمیں جھان ءَ را ھمے کلوہ دات کہ ریاستی توپکءُ زور مردمانی دیم ءِ ھاک ءِمچی اَنت۔ مرچی شمئے نہ ترسی ءُ توکل ءَ ھمے ریاست ءِ تونگری گوں ھاکاں ھوار کرتگ۔ مرچی ما پدی زر گوادر ءَ دریا ءِ لمب ءَمردمانی دریا دیستگ،آیانی چمانی تہ ءَ جوش ءُ جوزگ دیستگ، آ کودک ءُایمن اَنت۔ بلےریاست ءِ ایٹم بمب ءَ گیش توانمند اَنت ءُ مرچی اے مردمانی چمانی تہ ءَ من سوبمندی ءِ جوزگ دیستگ ءُ اے جوزگ پہ زوراک ءُ کشندھانی پروش دیگ ءَ بس اِنت۔
آئی ءَ گوشتگ کہ بلوچ راجی مچی اے وھد ءَ پدی زر گوادر ءَ نندانک ءِ دروشم ءَ برجاہ اِنت ءُ اد ءَ یک نیمگے ءَ ھزارانی کچ ءَ سلاہ بندیں ریاستی لشکر اِنت ءُ دومی نیمگ ءَکودک ءُ ایمنیں بلوچ اَنت۔ سلاہ بندانی دیم ءَ بلوچانی توکل ءُ جوزگ چو باتیل کوہ ءَ برز اِنت۔ من اے وھد ءَ ھمے کلوہ دیگ ءَ آتکگ آں کہ گیش ءَ چہ گیش گوادر ءَ سر بہ بہ اِت۔ راجیءُ مردمی ھک تیوک ءَ گوں مزن شانیں مردمی جھد ءَ گرگ بیت۔ گوادر مئے سرڈگار اِنت مارا وتی سرڈگار ءِ ھمک ٹکٹر ءَ راجی مچی برجم دارگ ءِ ھک ھست۔ اے ھک ءَ اچما جھان ءِ ھچ وڑیں زور پج گپت نہ کنت۔
ڈاکٹر ماہ رنگ ءَ گوشتگ کہ مئے نندانک داں درسیں کاروانانی گوادر ءَ پہ سلامتی سر بوگ ءُ مئے درسیں دزگیر کرتگیں مردمانی یل کنگ ءَ برجاہ بیت۔ پمیشکا ما ھر وڑیں رنجانی اوپار کنگ ءُ دیمونی دیگ ءَ جاڑیگ ایں۔ من گوں درسیں مردم، انجمن، سیاسی گل ءُ پارٹیانی گون ءَ لوٹ کن آں کہ آ بلوچ راجی مچی ءَ کمک بہ کن اَنت کہ آ وتی پلہ مرزی ءَ کرد ءِ دروشم ءَ پیش بدار اَنت۔
