سندھودیش روولیوشنری آرمی (ایس آر اے) سروک سید ازگر شاہ ءَ بلوچستان ءِ جاورانی پژدر ءَ وتی شنگ کرتگیں درشانے ءَ گوشتگ کہ گوادر ءَ مئے جنک ڈاکٹر ماہ رنگ ءِ سروکی ءَ بلوچ راجی مچی ءَ ھوار بیوکیں کاروانانی سر ءَ پنجاپی ریاست ءِ نیمگ ءَ بیوکیں پدریں زوراکیاں گوں ترندیں دانکاں ایر جن آں۔ پاکستان ریاست ءَ چو مدامی وڑ ءَ پیش داشتگ کہ اے ریاست نزور ءُ ایردستیں راجانی کشندہ اِنت۔
آئی ءَ گوشتگ کہ پاکستان ریاست ءِ اے پدریں زوراکی ھمے گپ ءِ منانک اِنت کہ ریاست نوں وتی گڈی آسر ءَ سر بوگ ءَ مزیک اِنت۔
ازگر شاہ ءَ گوشتگ کہ بلوچ راجی مچی ءَ بھر زوروکیں مردم دست ءُ گوش ءُ کودکیں بلوچ کماش، ورنا ءُ مئے ماتءُ گھارانی سر ءَ زورگریں لشکر ءِ آزار، دژمنیں ریاست پاکستان ءِ پروش ءُ بلوچ راجی مچی ءِ تچکیں سوبمندی ءِ منانک اِنت۔ بلوچ کماش، ورنا ءُ مئے مات ءُ گھارانی سر ءَ بوتگیں ارش ءُآزار ءَ ما وتی سر ءَ بوتگیں ارش ءُ آزار سرپد بہ ایں۔ پمیشکا کہ یک نزور ءُ ایردستیں راجے ءِ رنج ءُ اندوہ ءَ دومی نزور ءُ ایردستیں راج سرپد بیت۔
آئی ءَ گوشتگ کہ سندی راج ءُ یک زمہ واریں گلے ءِ بستار ءَ ما وتی براتیں بلوچ راج ءِگون ءَ زی اوشتوک بوتگ ایں ءُ مرچی ھم گوں آیاں اوشتاتگ ایں۔
