بلوچ آجوئی لوٹوکیں سلاہ بندیں گلانی ھم سنتیں گل بلوچ راجی آجوئی سنگر ( براس ) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ براس ءِ سرمچاراں 25 جولائی ءَ پنچ شمبے ءِ روچ ءَ پنجگور ءَ پاکستانی لشکر ءُ چیریں ادارھانی جوڑ کرتگیں کشندہ ٹولی ءِ سے کارمند کشتگ ءُ پنچ ٹپی کرتگ۔
جارکش ءَ گوشتگ کہ بلوچ راجی آجوئی سنگر ( براس) ءِ سرمچاراں پنجگور ءِ ھند کیلکور ءَ وتگڑیں کشندہ ٹولی ءِ کارمندانی ساڑی بوگ ءِ ھال رستگ، آیانی سر ءَ سرمچاراں زوت کاروائی کرتگ ءُ کیلکور کرکی ءَ ھمے کارمند انگر کرتگ اَنت ءُ آیانی سر ءَ اُرش کرتگ۔
بلوچ ھان ءَ دیمتر ءَ گوشتگ کہ سرمچارانی اُرش ءَ کشندہ ٹولی ءِ کارمند ناسر، جمل ء نزروک ءُ اسھاک ء نزوک جاھی مرتگ اَنت۔ سرمچاراں آیانی سلاہ ھم دستیگ کرتگ اَنت، دگہ پنچ کارمند ٹپی بوتگ۔ ھمے کارمند ملا سیپو ءُ سئید لاٹو ءِ سروکی ءَ راجی میارباری ءَ شریدار بوتگ اَنت۔
جارکش ءَ گوشتگ کہ اُرش ءِ میان ءَ پہ کشندہ ٹولی ءِ کارمندانی پھریزگ ءَ زورگریں لشکر ءِ جنگی بالگرداں تیرگواری کرتگ، انگت ءَ سرمچارانی تاوان دیگ ءُ وتی کارمندانی پھریزگ ءَ بے سوب بوتگ۔
جارکش ءَ گڈی ءَ گوشتگ کہ بلوچ راجی آجوئی سنگر ( براس) اے اُرش ءِ زمہ واری ءَ من ایت ءُ ما یکبرے پد ءَ کول کن ایں کہ براس داں سرجم ءَ بلوچ راجی آجوئی ءَ اے جنگ ءَ برجاہ دار ایت۔
