بلوچ نودربر گل ( بی ایس او ) ءِ جارکش ءَ وتی شنگ کرتگیں درشانے ءَ گوشتگ کہ بی ایس او ءِ سرکماش جیھند ءُ کمک سرکماش شیرباز،آیانی ھمبل پواد ءُ امان اللہ مینگل ءَ دوشی اسپنی دگ شال ءَ ریاستی لشکر ءَ آوار جتگ ءُ بیگواہ کرتگ اَنت۔
جارکش ءَ گوشتگ کہ گوستگیں لھتے روچانی میان ءَ بلوچ یکجھتی کمیٹی ءِ نیمگ ءَ 28 جولائی ءَ گوادر ءَ بیوکیں مچی ” بلوچ راجی مچی ” ءِ چن ءُ لانچ کنگ ءَ بوتگیں درزنانی کچ ءَ سیاسی کارکن آوار جنگ بوتگ اَنت۔ شال ءُ کراچی ءَ ھوار سرجمیں بلوچستان ءَ بلوچ آبادیانی سر ءَ ریاستی ادارھانی نیمگ ءَ مردم زور بیگواہ کنگ بوگ ءَ اَنت۔ آ داں انوں ھزارانی کچ ءَ بنت۔ درسیں شھدگ پہ روگ ءَ بند کنگ بوتگ اَنت۔ گودر ءُ تربت ءَ موبائل نیٹورک ءُ دامگ بند کنگ بوتگ اَنت۔
آئی ءَ گوشتگ کہ بلوچ پسگ ءُ سیاسی سروکانی زوریں بیگواہ کنگ ءِ درچ چہ دھکاں برجاہ اِنت۔ جتائیں وھداں سیاسی سروک زور بیگواہ کنگ ءُ چیریں آزار جاھاں رستری سزا دیگ بوگ ءَاَنت۔ اے وڑیں ناشرکاری ریاست ءِ پروش ءَ گیش پدر کنت۔ بلوچستان ءَ مردمانی زرمبشت ریاستی زوراکیانی بگیریءَ مردمانی رنجاں پیش دار ایت۔ ریاست دیمتر ءَھمے شوندات ءِ سر ءَ کارکنگ ءُ تیوک ءَ وتی پروش ءِ چن ءُ لانچ ءَ اِنت۔
جارکش ءَ گڈی ءَ گوشتگ کہ بی ایس او گل ءِ سروکانی آوارجنی ءَ بلوچ راجی مزن زانشتی ءِ سر ءَ ارش گمان کنت۔ اے ھچ وڑ ءَ منگ نہ بیت۔ بی ایس او پہ وتی سروکانی کیس ءِمڑگ ءَ ھرپیمیں جھد کنت۔ گل وتی آھوکیں گامگیج ءِ جار ءَ زوت پریس کانپریس ءِ دروشم ءَ گوش ایت۔
