ھزدار: گریشگ ءَ پرندوشی پاکستانی لشکر سی ٹی ڈی ءِ بیڑ برگ ءُ جنین ءُ زھگ ءُ آدگہ مردمانی ٹپی کنگ ءُ شش مردمانی آوار جنگ ءُ زوریں بیگواھی ءِ بگیری ءَ مرچی دومی روچ ءَ زھرشانی نندانک برجاہ بوتگ۔
زھرشانی ءَ نودربر، جنین ءُ زھگ، سیاسیءُ چاگردی کارکناں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔ زھرشانی کنوکیں مردم زی گری ءَ نندوک بوتگ اَنت مرچی ٹوبڑو ءَ دگ اِش بند کرتگ ءُ نشتگ اَنت۔
زی ،دوشی، مرچی واکدار پہ گپ ءُتران ءَ آتکگ اَنت کہ شما دگ ءَ پچ کن اِت ما شمئے مردماں یل کناھین ایں۔ اے باروا زور بیگواھیں مردمانی کھول ءِ گوشگ اِنت دانکہ مئے مردم یل کنگ نہ بوتگ اِنت ما وتی زھرشانی ءَبرجاہ دار ایں۔
یات بہ بہ اِت کہ پرندوشی سی ٹی ڈی ءَ گریشگ ءِمیتگ کوچو ءَ بیڑ برتگ ءُ تیرگواری کرتگ۔ تیرگواری ءُ لٹ شاپ ءِ آسر ءَ جنیناں ھوار باز مردم ٹپی بوتگ اَت ، شاہ جانء سلیم، گوھر دین ء ھیرجان، مھم جان ء لال بکش، میار ء لال بکش، مھمد آرپ ء ابدارھمان ءُ منیر ءسبرو آوار جتگ ءُ بیگواہ کنگ بوتگ اَنت۔ سی ٹی ڈی ءِ تیرگواری ءَ زور بیگواھیں منیر ءِ مات ءُ پت ھم ٹپی بوتگ اَنت۔ کلدار، پرپٹ، موبائل ءُ آدگہ گران نھادیں سامانی برگ ءِ ھواری ءَ ڈگارانی سر ءَ مشین ءُ سولر تیرگواری ءُ تباہ کرتگ اَنت۔
