شال: پاکستانی لشکر ءِ دست ءَ زور بیگواھیں زھیر اھمد ءِ کھول ءِ نیمگ ءَ سیشن کورٹ سریاب ءَ زھرشانی روانکے کشگ بوتگ ءُ بلوچستان زانشتجاہ ءِ دیم ءَ مچ بوتگ اَنت ءُ زھرشانی اِش یاداشت کرتگ۔
زھرشانی روانک ءَ زور بیگواھیں مردمانی کھولءُ نودربر گل، سیاسی پارٹیاں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔ آیانی زور بیگواھیں مردمانی اکس ءُ پلے کارڈ دستاں بوتگ اَنت ءُ پہ زوریں بیگواھیانی گرگ ءُ دار کنگ ءَ لوٹ اش کرتگ۔
زھرشانی ءَ بیگواھیں بلوچانی توار ( وی بی ایم پی ) ءِ سرکماش نسر اللہ ءُ زھیر اھمد ءِ گھار ءَ ھوار آدگہ مردماں تران کرتگ ءُ گوشتگ کہ زھیر اھمد 27 جون ءَ چہ شال ءَ درکانودی آوار جنگ ءُ بیگواہ کنگ بوتگ۔ آئی کھول گوستگیں شش روچ اِنت کہ سیشن کورٹ ءِ دیم ءَ زھرشانی ءَ نشتگ اَنت۔ بلے بژن اِنت کہ بلوچستان سرکار ءِ نیمگ ءَ انگت ءَ ھچ وڑیں گامگیج زورگ نہ بوتگ۔
آیاں لوٹ کرتگ ءُ گوشتگ کہ آ زھیر اھمد ءِ کھول ءِ زھرشانی ءِ باروا دلگوش ءَ گور بہ کن اَنت ءُ گوں آئی کھول ءَ گپ ءُ تران کنگ ءُ پہ زھیر اھمد ءِ آجوئی ءَ دلجمی دیگ بہ بیت۔ چہ زھیر اھمد ءِ زوریں بیگواھی ءَ آئی کھول سکا جنجال اِنت۔
