شال: آواران ءِ جاہ منند زور بیگواھیں ڈاکٹر ابدالھی ءِ کھول ءَ چہ بیگواھیں بلوچانی توار ( وی بی ایم پی ) ءِ زھرشانی گدان ءَ پریس کانپریس کرتگ ءُ گوشتگ کہ آواران دمگ ءَ چنچو سال اِنت جاور ناگیگ اَنت ءُ ھمک روچ جاور گنتر بوان اَنت۔ ھمک روچ پجار نہ بوتگیں مردم لس شھرمننداں آوار جنگ ءُ بے میار ءَ لٹ شاپ ءُ سسائی آزار دیگ ءَ پد یل کنگ ءَ اَنت یا چونیں ھم دروگیں میڑے ءَ سلاہ بند پیش دارگ ءُ بے میار ءَ راھبند ءُ کانود ءَ ڈن شھید کنگ ءَ اَنت ایشی چنچو منانک ھست۔
آئی ءَ گوشتگ کہ ابدالھی ء ھاجی مھمد اسلم یک آپریشن تھیٹر اسسٹنٹے ءُ گوستگیں چنچو سال اِنت آواران ءَ مردماں درمان کنگ ءَ اِنت۔ یک جون ءَ وتی کار ءِ سر ءَ بوتگ کہ پاکستانی لشکر ءَ آوار جتگ ءُ چیریں آزارجاھے ءَ بندیگ کرتگ۔ ما آئی آوارجنی ءِ بگیری ءَ دمگ ءِ درسیں زمہ وارانی گون ءَ رھوت کرتگ۔ پولیس ءُ لیویز ءَ ھوار واکداراں ابید دلبڈی ءَ دگہ وڑیں گامگیج نہ زرتگ ءُ نیکہ سی ءُ دو روچانی تہ ءَ آمیدگسے ءَ پیش کرتگ۔ پہ آئی ءَ مئے ترس گیش بوگ ءَ اَنت۔
آئی ءَ گوشتگ کہ ابدالھی یک نوکرے آ چہ پگار ءَ گزراں کنگ ءُ وتی گس ءَ والینگ ءَ بوتگ آئی درسیں مردم سانمند اَنت۔ ما گوں شما اھوالکاراں لوٹ کن ایں کہ وتی کرد ءَ پیلو بہ کن اِت۔ ابدالھی ایپ سی ءِ پوشاک پوش اتگیں مردماں آوار جتگ ءُ برتگ ءُ پہ آئی زندگی ءَ ترس اِنت۔ آئی آجوئی مئے شمئے درسانی کمک ءِ چمدار اِنت۔
