ایس آر اے ءِ سروک سید ازگرشاہ ءَ وتی شنگ کرتگیں درشانے ءَ گوشتگ کہ چین مئے گنتریں دژمن ءُ مئے ایردست کنوکیں پنجاپ زوگر ءِ درساں نزیکیں ھمسنت اِنت ءُسندی راج ءِ ھمک شھزانتیں مردم ءُ زرمبشت ءِ باسک شر سرپد اَنت کہ دژمن ءِ دوست دژمن بیت۔ پمیشکا چین ءِ وڑیں زورگریں توان ءُ مئےراجی دژمن ءِ دوست گوشوک ءُ پہ آئی پھازداری ءَ پلہ مرزی کنوک چہ زانشت ءَ زبھر ءُ وتسریں سروک ءُ ٹولی کرت کن اَنت۔
ازگر شاہ ءَ دیمتر ءَ گوشتگ کہ گوستگیں چہ ھپتاد ءُ ھپت سالاں چین مئے سرءَ زورگر یں پنجاپی ءِ نزیکیں ھمسنت بوتگ ءُ گوں ایشی ھواری ءَ نہ تیوک ءَ مئے سندی ءُ بلوچانی درسیں دریا، تیاب دپ، ڈگار، توان، مڈی روگ ءُ آھگ ءِ دگارانی سر ءَ زورگپت بوتگ بلکیں ساؤتھ ایشانی ءِ اے دمگ ءُ سرجمیں جھان ءِ پھازداری ءَ رسک بوتگ۔ گوں اے وڑیں ترسناکیں دژمن ءُ لٹ ءُ پلیں توامندے ءَ سلاہ یا پھازداری ءِ گپ چون کنگ بیت۔ تیوک ءَ ھمے جاوراں چین مئے دژمن پنجاپ ءَ مدام سیاسی، مالی ءُ لشکری کمک دیگ ءَ اِنت۔ چے سکر بئراج ءِ یک ءُ دو دروازگ ءِ شر کنگ ءِ سوب ءَ ما چین ءِ سرجمیں سند دژمنی ءِ پہ کردار ءَ لوٹائین ایں۔ اے وڑیں کمک ءُ پلہ مرزی ءِ جاھلیں مردم کرت کن اَنت۔ بلے سیاسی سوھوئیں گل، راجی زرمبشت ءُ آئی سروک کدی اے وڑیں ردی ءَ نہ کن اَنت۔
آئی ءَ گوشتگ کہ راجی زرمبشت یک مردم ءُ ٹولی ءِ مڈی نہ اِنت، اے یک دراجکشیں راھبندے۔ ایشی تہ ءَ بازیں کسان ءُ مزنیں گل ھوار اَنت۔ اے گلانی وتی سروک، ادارھانی وتی شوندات ھست اَنت۔ اے وڑیں وتساچیں سروک یا ٹولی اے درسیں گل ءُ ادارھانی نیمگ ءَ تیوک ءَ وتسر ءَ گپ جت کنت؟ پمیشکا ما اے وڑیں وتسر ءُ ردیں درشاناں رد کن ایںءُ ھمے گپ ءَ تچک کن ایں کہ مئے گل ایس ار اے ءِ وتی وتواکیں ادارہ ، وتی سوڑگ ءُ شوندات ھست اَنت۔ پمیشکا ما چین ءِ انجیئیر ءِ پھازداری ءِ ھر وڑیں زمہ واری گپ ءِ منگ ءَ ھچ وڑ ءَ رزا نہ ایں۔
سید ازگر شاہ ءَ گڈی ءَ گوشتگ کہ ما ھمے سرپد بہ ایں کہ ھچ وڑیں وتسریں مردم ءُ ٹولیانی نیمگ ءَ اے وڑیں ھچ لیکہ سند ءُ راجی زرمبشت ءِ سیاسی ءُ لیکھی بنیاد ءَ رد دیگ ءُ گمراہ کنگ یک دمکے ءِ تہءَ بند کنگ ءَ ابید دگہ ھچ نہ اِنت۔پمیشکا اے وڑیں لیکہ سند، راجی زرمبشت ءُ ایس آر اے ھمسنتی لیکہ ءِ بنیاد ءَ ھچ وڑا نہ من ایت ءُ سرجم ءَ رد کنت۔
