زورگریں مھترھند ءَ راسکوہ ءَ ایٹمی تْراک کرتگ ءُ بلوچ راج ءَ ھمے کلوہ داتگ کہ بلوچاں ھچ ارزشت نیست، آیانی ڈگار ءِ سر ءَ پاکستان ھرچ وڑیں چکاس کرت کنت۔اے سسایانی درانگازی بلوچ راجی زْرمبشت ( بی این ایم ) ءِ شھید بانک کریمہ سیل ( سلیمان کوہ) ءِ مراگش ءِ تْرانک کنوکاں کرتگ۔
اے مراگش 28 مئی 1998 ءَ چاگے ءِ ھند ءَ بیتگیں ایٹمی بم ءِ چکاس ءُ آئی ءِ بلوچستان ءِ اگواز ( ماحول ) ءِ سر ءَ سان ءِ بنگپ ءَ اَت۔
گْوشتانک دیوکاں گْوشتگ پاکستان ءَ بلوچ گلزمین ءِ سر ءَ ایٹمی تْراک کرتگ ءُ اے روچ ’یوم ء تکبیر‘ ءِ نام داتگ۔اے تْراکانی پد ءَ راسکوہ ، چاگے ءُ کش ءُ کراں تھر پہ تھریں نادْراھی ٹومب اتگ۔اے نادْراھیانی زانگ ءُ گر ءُ دار ءِ گامگیج دیر ءِ گپے چہ مھترھند ءِ نیمگ ءَ درمان ءِ آسراتی ھم دیگ نہ بیتگ پرچا کہ پہ زورگر ءَ بلوچستان ایوک ءَ چکاس جاھے ءِ بستار ءَ اِنت۔
آیاں گْوشتگ پہ پاکستانی ایٹم بم ءِ جوڑ کنگ ءَ کارمرد بیوکیں ’یورنیم ‘ چہ سلیمان کوہ ءِ ھند بگلچر ءَ کشگ بیگ ءَ اِنت چہ ایشی ءَ سلیمان کوہ ءِ سرجمیں دمگ شیمک ءَ پیڑاتگ۔ اے دمگ ءَ چوشیں ھندے نیست کہ آ اود ءَ شیمک ءَ وتی گام ایر نہ کرتگ اَنت۔پٹ ءُ پولے ءِ رد ءَ سلیمان کوہ ءِ سجھیں آپی امبارانی تہ ءَ انچیں نکان ( عنصر ) ھست کہ چہ آیاں شیمک ءِ نادْراھی بیت کنت پمیشکا سلیمان کوہ ءِ نندوکاں شیمک گرگ ءَ اِنت۔مروچی سلیمان کوہ ءَ چوشیں لوگے پشت نہ کپتگ کہ آ اود ءَ شیمک ءِ نادْراھے مہ بیت۔
گْوشتانک دیوکاں گْوشتگ اے درسیں جیڑھانی بن مئے چیردستی اِنت مارا وتی مردم ھمے چیردستی ءِ بارہ ءَ زانت ءُ سرپدی دیگی اَنت ءُ آیاں اے سرپد کنگی اِنت کہ آ چیردستی ءِ بگیری ءَ پاد بہ یا اَنت ءُ آجوئی لوٹوکیں گلانی ھمراہ بہ بہ اَنت۔
آیاں اے مارشت ءُ ھل ھم درانگاز اتگ کہ آیاں وتی گل ’ بی این ایم ‘ ھم مھکم کنگ لوٹ ایت ، مارا مردمانی تہ ءَ وتی گل ءِ اے کلوہ سر کنگی اِنت کہ ما چہ اے جاور ءَ ھما وھد ءَ در اتک کن ایں کہ ما چیردستی ءِ بگیری ءَ جھد بہ کن ایں۔
آیاں مسام اتگ کہ آ پہ وتی گل ءِ پرکاری ءَ گوں وتی سرجمیں توان ءَ کوشست کن اَنت داں گیش ءَ گیش مردم گوں ما ھوار بہ بیت ءُ چیردستی ءِ باریگ کستر بہ بیت۔
