تربت: چہ بلیدہ ءَ پاکستانی لشکر ءِ دست ءَ زور بیگواہ کن بوتگیں مسلم آرپ، پتہ میار ءُ جھانزیب ءِ کھولاں آئید ءِ روچ ءَ تربت ءَ زھرشانی کنگ ءِ جار جتگ۔
کھولانی گوشگ اِنت کہ آئید ءِ سھب ءَ شھید پدا اھمد چاراہ ءَ زھرشانی ءَ نند ایں ءُ بیگاہ ءِ پنچ ءُ نیم ءَ چہ تربت پریس کلب ءَ داں شھید پدا اھمد چاراہ ءَ زھرشانی روانکے کش ایں۔
آیاں گوں کیچ ءِ مردماں لوٹ کرتگ ءُ گوشتگ کہ باندا آئید ءِ روچ ءَ وت ءَ زھرشانی جاہ ءَ سر بہ کن اِت ءُ پہ مئے زور بیگواھیں مردمانی آجوئی ءَ توار چست کنگ ءَ مئے کمک ءَ بہ کن اَنت۔
یات بہ بہ اِت کہ اے کھول ساریءَ تربت ءَ دمگدار ءِ کارگس ءِ دیم ءَ زھرشانی ءَ نشتگ اَنت، چہ واکدار ءِ دلجمی دیگ ءَ پد آیاں وتی زھرشانی ھلاس کرتگ اَت ءُ تربت ءَ داشتگ اَنت۔
