ھزدار: گوستگیں روچ ءَ پاکستانی لشکر ءِ دست ءَ زور بیگواہ کنگ بوتگیں انیس ءِ زوریں بیگوھی ءِ بگیری ءَ کھول ءَ ایدی چاراہ ءَ شال کراچی شھدگ بند کرتگ۔ دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتوک اَنت۔
انیس ءَ پاکستانی لشکر ءِ جوڑ کرتگیں چیریں ادارھانی کارمنداں پرندوشی شپ ءِ ھشت ءَ آوار جتگ ءُ بیگواہ کرتگ۔ زور بیگواھیں انیس بھاولدین زکریا زانشتجاہ ءِ نودربرے۔
انیس ءِ کھول ءَ زی وتی شنگ کرتگیں جارے ءَ گوشتگ اَت کہ اگاں انیس داں باندا یازدہ ءَ آجو نہ بوت ما زھرشانی ءَ شھدگ ءَ بند کن ایں ءُ نند ایں۔
زھرشانی کنوکیں مردمانی گوشگ اِنت دانکہ انیس یل کنگ نہ بوتگ ما وتی زھرشانی نندانک ءَ برجاہ دار ایں۔
