زور بیگواھیں آسپ ءِ گھار سائرہ ءَ وتی تامربندے ءَ گوشتگ کہ منی برات آسپ ءُ منی ناکوزتک رشید 31 اگست 2018 ءَ نوشکےءِ نامداریں سواد جاہ زنگی ناوڑ ءَ ھمبلانی ھمراھی ءَ آوار جتگ ءُ بیگواہ کنگ بوتگ اَنت۔ ریاستی ادارھانی نیمگ ءَ آیانی دزگیری ھم پدر کنگ بوتگ۔ آیانی آزار داتگیں اکس ھم شنگ کنگ بوتگ اَنت۔ گوستگیں شش سال اِنت کہ ریاستی ادارھاں منی برات درکانودی بیگواہ کرتگ اَنت، ما نزانیں کہ آ چون ءُ کج ءَ اَنت۔
آئی ءَ گوشتگ کہ منی ناکوزتک ءِ مات ءَ دلءَ گپتگ ءُ بیران بوتگ پمیشکا کہ آمچی سزا ءِ آماچ بوتگ کہ آئی اوپار کرتگ نہ کرتگ ۔ منی ناکوزتک سلمان13 نومبر 2022 ءَ چہ شال ءَ بیگواہ کنگ بوتگ۔ پد ءَ ھما اِت کہ ما نزانیں آ چون ءُ کج ءَ اَنت۔ مئے کھول چہ سالاں ریاستی زوراکیانی آماچ اِنت۔ ما وشھالیں زند گوازینگ بیھال کرتگ۔ مئے کھول ءِ ھمک زھگ ترس آماچ اِنت کہ ما بیگواہ کنگ مہ بہ ایں۔ ما چہ سالاں ھمے اوست ءَ جھد کنگ ءَ ایں کہ بلکیں ریاستی ادارہ مئے آزیزاں آجو بہ کن اَنت۔بلے چہ منی براتانی آجوئی ءِ جاہ ءَ ما جتائیں وڑ اں ترسینگ بوگ ءَ ایں۔
سائرہ ءَ گوشتگ کہ مئے ترسینگ ءَ برے سرپ گاڑی مئے رند ءَ کاینت ءُ برے مارا مرگ ءِ بیھار ءَ دے اَنت۔ ریاستی ادارھان ءَ مارا انساپ دیگی بوتگ بلے ریاست ءَ وتی تیوگیں لشکر مئے سر ءَداتگ کہ آ مارا کجام وڑ ءَ بے توار کرتگ کن اَنت۔ مئے کر ءَ اَبید ءِ جھد ءَ دگہ ھچ راہ ءُ در نیست۔
آئی ءَ گوشتگ کہ شما مئے توار ءَ مھکم کرتگ کن اِت ءُ پما توار چست کنگ شمئے درسانی سر ءَ پرز اِنت۔ اے زوراکی ءِ بگیری ءَ توار چست بہ کن اِت ءُ 24 مئی ءَ شپ ءِ ھپت ءَ داں دوازدہ ءَ پہ منی براتاں بیوکیں کمپئین ءَ بھر بزور اِت۔
